Eldiń ishki isine aralasý bolyp tabylady

Belgili bolǵandaı, Eýroparlament depýtaty Pol Merfı óziniń Mańǵystaý oblysyna jasaǵan sa­pa­ry barysynda Qazaqstan azamat­taryn jappaı aksııaǵa shaqyryp, Qazaqstannyń atqarýshy jáne sot bıligine orynsyz til tıgizýge jol bergen. Pol Merfı tarapynan biz­diń elimizdiń zańnamasyna sáıkes jol berilmeıtin ister, ıaǵnı sot jumysynyń qyzmetine aralasý, sot pen onyń sheshimderine qysym ja­saýǵa tyrysqany baıqaldy. Zań boı­ynsha mundaı is-áreketke bar­ǵan­dar jaýapqa tartylady (Qazaqstan Respýblıkasynyń Ata Zańy 77-bap). QR SIM jaǵdaıdy egjeı-tegjeıli qarastyryp, Eýroparlament ókilderiniń táýelsiz Qazaqstan Res­pýblıkasynyń ishki sharýasy bolyp tabylatyn máselelerge aralasýyna jol berilmeý qajet dep sanaıdy. Sonymen qatar, eldegi saıası tu­raq­syzdyq pen qoǵamdyq qarama-qaı­shylyqtar týǵyzatyn kez kelgen aksııalar memleketimizdiń Ata Za­ńynda bekitilgen prınsıpterge qar­sy keledi. Sondaı-aq Eýroparlament depýtatynyń keıbir aıtqan sózderinen áleýmettik arazdasýǵa jol berilgen. Bul áreketke de qyl­mystyq zańnamamen jaýapqa tar­tylady (Qazaqstan Respýblıkasy Qylmystyq kodeksiniń 164-baby). Eýroparlament depýtaty Pol Merfıdiń áreketi men sózderi ha­lyqaralyq quqyqtyń prınsıpteri men normalaryn qatań buzǵany bo­lyp sanalady jáne de BUU Jar­ǵysynyń negizgi prınsıpterine qaı­shy keledi (7-tarmaq, 2-bap, mem­­lekettiń ishki quzyretindegi má­se­lelerge aralaspaý). Atap aıtqan­da, 1970 jylǵy halyqaralyq qu­qyq prınsıpteriniń deklarasııa­sy­na; 1982 jyly BUU Bas Assam­bleıasymen maquldanǵan, Memle­ket­tiń ishki máselelerine qatysty ıntervensııa men qol suǵýshylyqqa jol bermeý jónindegi deklara­sııa­ǵa; 1975 jylǵy Eýropadaǵy qaýip­siz­dik jáne yntymaqtastyq jónin­de­gi keńestiń Qorytyndy akt prın­sıpteriniń deklarasııasy jáne Qa­zaqstan Respýblıkasy men Eýro­pa­lyq qaýymdastyq jáne onyń múshe elderi arasyndaǵy áriptestik pen yntymaqtastyq jónindegi keli­sim­niń (1995 jyldyń 23 qańtar) negizine qaıshy keledi. Syrtqy saıasat vedomstvosynyń tıisti ustanymy EO ókilderine málimdeldi. Joǵaryda atalǵan laýazymdy tulǵalardyń zańsyz áreketteri Eýroparlament tarapynan tıisti túr­de baǵalanyp, qazaqstandyq tarap ol týraly der kezinde habardar bo­la­dy degen úmit artamyz, dep ha­barlady Qazaqstan Respýblıkasy Syrtqy ister mınıstrliginiń baspa­sóz qyzmeti.