Astrahan aýdanyndaǵy Jaltyr aýylynda jan jadyratar sporttyq spartakıada bolyp ótti. Ol kópten kútken stadıonnyń ashylý saltanatyna arnalyp, jergilikti turǵyndar Esil, Kapıtonovka jáne Jýravlevka aýyldyq okrýgterinen kelgen sportshylarmen baq synasty. Birden aıtaıyq, jaltyrlyqtar namysqa tyrysyp, jeńisti qoldan bermedi. Al, jańa sport keshendi aýyl sharýashylyǵy ǵylymdarynyń doktory Ǵalym Qudaıbergenov basqaratyn «Logos-Treıd» JShS syıǵa tartyp otyr.
– Elbasy Nursultan Nazarbaev «Bolashaqtyń irgesin birge qalaımyz» atty Joldaýynda bıznes ókilderine úlken jaýapkershilik júktedi, – dedi saltanatta sóz sóılegen Ǵ.Qudaıbergenov. Onda salamatty ómir saltyn qalyptastyrý memlekettik másele retinde kóterildi. Jaltyr aýylyndaǵy Sergeı Kolomoes basqaratyn bizdiń qanattas kásipornymyz – «Betege-Ý» jaýapkershiligi shekteýli seriktestiginiń keńse qyzmetkerleri tamyz aıynan jumysty tańerteńgi deneshynyqtyrýmen bastaýda. «Deni saýdyń – isi saı» deıdi halqymyz. Bul – qoǵamnyń saýlyǵy men baılyǵy. Qazaqstandy qýattandyrý barshamyzdyń qolymyzda ekendigin umytpaıyq.
Jańa stadıonnyń aýmaǵy qorshalyp, ásem bezendirilgen. Munda sporttyń kez-kelgen túrinen jarystar ótkizýge múmkindik bar. Jankúıerler úshin oryndyqtar qoıylyp, jabyq trıbýna jasaqtalǵan. Iаǵnı, aýdandyq deńgeıdegi básekelerdi ótkizýge de ábden jaraıdy.
Aýyl qýanyshyna Sosıalıstik Eńbek Eri E.Zolotarev, QR UǴA akademıgi E.Gossen, Germanııa kásipkeri R.Kremer, Astrahan aýdanynyń ákimi R.Ákimov ortaqtasty.
Baqbergen AMALBEK,
Aqmola oblysy.