Ardagerlerdi ardaqtaý baǵytyndaǵy is-sharalar óńirde mamyr aıynyń alǵashqy kúnderinen bastalyp ketti deýge bolady. Oblys ákimi Danıal Ahmetov 5 mamyr kúni О́skemende óńirdegi Uly Otan soǵysynyń 30 ardagerine Elbasy atynan 500 myń teńgelik sertıfıkatty saltanatty túrde tapsyryp, merekelik dastarqan jaıyp, osy kúni qaladaǵy birneshe soǵys ardagerin úıine arnaıy baryp quttyqtap, osyndaı syı-sııapatty tabys etti.
Erteńinde Kókpekti aýdanyndaǵy 3 birdeı Keńes Odaǵynyń batyry shyqqan Podgornoe aýylyna baryp, aýdan-aýyl turǵyndaryn merekemen quttyqtap, birneshe soǵys ardagerine joǵaryda atalǵan 500 myń teńgelik sertıfıkatty tapsyrdy. Sonymen qatar osy kúni Semeıdegi birneshe soǵys ardageriniń úıine baryp, syı-qurmet kórsetti. Oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Elena Starenkova mundaı syıaqy oblysta turatyn 328 ardagerge tapsyrylatynyn aıtty. Al tyl ardagerlerine qala men aýdan ákimdikteri múmkindiginshe qarjylaı jáne materıaldyq turǵydan qoldaý kórsetedi.
Mereke qarsańynda aımaqtyń túkpir-túkpirinde ómirden ótken, erligimen el esinde qalǵan ardagerlerdiń esimderin ulyqtaý maqsatynda birqatar taǵylymdy is-sharalar qolǵa alyndy. Máselen, Semeıdegi Dalnıaıa kóshesine Keńes Odaǵynyń batyry Zákárııa Belibaevtyń, al Katonqaraǵaı aýylyndaǵy Lenın atyndaǵy orta mektepke Seıitqamza Lastaevtyń esimi berildi.
О́skemende Keńes Odaǵynyń batyry Tólegen Toqtarovtyń qurmetine kóshe merekesi uıymdastyrylyp, qala turǵyndary batyrdy eske alyp, túrli mádenı-tanymdyq is-sharalar ótkizdi. Aıagóz aýdanynda Keńes Odaǵynyń batyry Muqataı Ábeýulynyń ǵasyrlyq mereıtoıyna oraı Saryqamys aýylyndaǵy batyr esimi berilgen mektepte murajaı, eldi mekende «Erlik dańqy» saıabaǵy ashyldy.
Al endi búgingi kúnge kelsek. О́skemendikter Uly Jeńis merekesin tań bozynan beri atap ótip jatyr desek artyq aıtpaǵan bolarmyz.
«Dańq polki» aksııasy aıasynda 10 myńnan astam qala turǵyndary tańǵy saǵat 10-da О́zen vokzalyna jınalyp, «Dańq» memorıalyna deıingi aralyqty jaıaý júrip ótti. Maıdangerlerdiń sýretterin kóterip, sherýdi bastaǵan turǵyndar arasynda oblys ákimimen qatar óńirdiń ózge de laýazymdy tulǵalary boldy. Ertis jaǵasyndaǵy alańqaıǵa jınalǵan qala jurtshylyǵyn aımaq basshysy Danıal Ahmetov merekemen quttyqtap, jyly lebizin bildirdi.
«Qymbatty ardagerler! Qurmetti shyǵysqazaqstandyqtar! Sizderdi Uly Otan soǵysyndaǵy Jeńis kúnimen shyn júrekten quttyqtaımyn. Oblysymyzdyń qalalary men aýdandarynan maıdanǵa 170 myńnan astam adam shaqyrylǵan bolatyn. Shyǵys Qazaqstannyń 109 jaýyngeri «Keńes Odaǵynyń Batyry» ataǵyn ıelendi. Uly Otan soǵysy jyldary alystaǵan saıyn ákelerimiz ben atalarymyzǵa degen qurmetimiz odan ári arta túspese kemimek emes. Otan úshin otqa túsken jandarǵa basymyzdy ıemiz. Merekelerińiz qutty bolsyn, qymbatty jerlester», - dedi oblys ákimi.
Budan keıin aımaq basshysy bastaǵan laýazymdy tulǵalar, basqarma, kásiporyn basshylary men ártúrli uıymdardyń jetekshileri, ardagerler men jastar «Máńgilik alaýǵa» gúl shoqtaryn qoıdy.
Dál osy jerde áskerı tehnıkalardyń kórmesi uıymdastyrylyp, soǵys ardagerlerine soldat botqasy taratyldy. Sonymen qatar teatrdyń akterleri tiri eskertkishke aınalyp, qala turǵyndaryn erekshe qýanyshqa bóledi.
Qaladaǵy merekege arnalǵan is-sharalar áli de jalǵasýda. Keshke qaraı «Dańq» memorıalynda «Bul tiriler úshin qajet» atty teatrlandyrylǵan kórinis uıymdastyrylyp, «Maısham jaq» aksııasy ótetin bolady.
Azamat QASYM,
«Egemen Qazaqstan»
О́SKEMEN