Maǵjan Jumabaev atyndaǵy oblystyq ǵylymı-ámbebap kitaphanasynda «Nur Otan» halyqtyq-demokratııalyq partııasy Aqmola oblystyq fılıalymen birlesip ótkizgen «Kitap syıla – izgilik syıla» aksııasynyń qorytyndysy shyǵaryldy.
Jınalǵan qaýym aldynda sóz alǵan «Nur Otan» HDP oblystyq fılıaly tóraǵasynyń birinshi orynbasary Ǵalym Shoıkın aýyl kitaphanalaryn baspa ónimderimen tolyqtyrýdy maqsat etetin sharanyń tereń mańyzy barlyǵyn atap ótti. Oblystyq partııa uıymy buǵan deıin balalar úıleriniń, qylmystyq atqarý júıeleriniń kitaphanalaryn tolyqtyrýda belsendi jumys atqardy. Aldaǵy kezde de júrekterge izgilik nuryn quıatyn aksııalardy jalǵastyrý nıeti qoldaý taýyp otyr. Oǵan ózge de qoǵamdyq uıymdar men ulttyq-mádenı ortalyqtardy jumyldyrý kózdelgen.
Oblystyq tilderdi damytý basqarmasynyń bastyǵy Ǵosman Tóleǵul men oblystyq mádenıet basqarmasy bastyǵynyń orynbasary Bazarbaı Kákenov, oblystyq kitaphananyń dırektory Arman Berdalın jáne basqalar aksııaǵa qatysýshylarǵa alǵys sezimderin bildirdi.
Qazirgi kezde ıgi dástúrge aınala bastaǵan sharaǵa jurtshylyq aıryqsha kóńil bólip, belsendilik tanytyp otyr. Máselen, Sara Muqatova óziniń otbasylyq kitaphanasynan 360 ataýdaǵy tarıhı, tehnıkalyq jáne kórkem ádebı kitaptaryn syıǵa tartqan. Jalpy, aksııa barysynda 4 myńnan astam kitap jınalyp, aýyldardaǵy bilim oshaqtaryna jiberildi.
Baqbergen AMALBEK,
Aqmola oblysy.