Tamyz aıy tamyljyp, dala jumystarynyń qarbalastyǵymen erekshelenýde. Dıqandar as atasy – nannyń moldyǵy úshin ter tógip, kóktemniń ár kúnin tıimdi paıdalandy. Nátıjesinde 391094 gektarǵa sebilgen dándi-daqyldyń qazirgi kezde 133243 gektaryna oraq túsken. Jáne 254707 tonna altyn dán bastyrylyp, qambaǵa quıyldy. Qazir bereke bastaýy sanalatyn jaýapty naýqan óńirdiń barlyq aýdandarynda qaýyrt júrgizilýde. Máselen, Jambyl, Eńbekshiqazaq, Eskeldi, Talǵar, Kóksý, Ile aýdandarynyń dıqandary ózgelerden alda.
Oraq túsken sátten bastap, kelesi jylǵa tuqym quıý jumysy da qarqyn aldy. Kelesi jylǵa qajetti 92429 tonna tuqymnyń aldy tıisti oryndarǵa jetkizilgeni osynyń dáleli.
Jetisýdyń topyraǵy torqa, japyraǵy qamqa ekeni belgili. Qunarly jerge otyrǵyzylǵan masaqty daqyldan keıingi baǵaly taǵam – kartop jınaý barlyq aýdandarda jalǵasqan. Aǵymdaǵy jyly oblystaǵy 35278 gektarǵa sebilgen kartoptyń 4300 gektary jınaldy. О́nim Almaty men Taldyqorǵan qalasynyń tutynýshylaryna usynylyp, bazar sórelerinen oryn aldy. Orta eseppen ár gektardan 138,3 sentnerden túsim jınalýda. Eńbekshiqazaq, Qarasaı, Jambyl, Eskeldi, Talǵar aýdandary men Tekeli qalasynyń dıqandary atalǵan daqyldy jınaýda belsendilik tanytsa, kartoptyń jalpy túsimi 38511 tonnaǵa jetti.
Bıyl jetisýlyqtar 27175 gektarǵa kókónis túrlerin ornalastyrsa, 5236 gektar alqaptyń ónimi jınaldy. Jalpy túsim 128150 tonnany qurady. Baqsha daqyldarynan alynatyn ónim de joǵary. Osylaısha jazǵy dala jumystary uıymshyldyqpen atqarylyp, dıqan qaýymy ony ysyrapqa ushyratpaı, der kezinde jınap alýǵa kirisken.
Qazirgi tańda oblysta altyn astyqty saqtap, óndiriske jetkizetin 28 kásiporyn men elevator bar. Talapqa saı jyl saıyn astyq qabyldaý mekemeleriniń biliktiligi jáne jańa astyq qabyldaýǵa daıyndyǵy tekserilgen.
Ońtústik aımaq ókildigi boıynsha Azyq-túlik kelisim-shart korporasııasy 2010 jyly tenderlik negizde Kóksý aýdanynda ornalasqan «Bozdaq» astyq qabyldaý kásipornyn memlekettik astyq qoryn saqtaýǵa tańdap alǵan edi. Onda 200 tonna ekinshi klasty arpa saqtalǵan.
Qazirgi kezde oblystaǵy astyq qabyldaý kásiporyndary jańa astyqty qabyldaý kezinde materıaldyq-tehnıkalyq bazalardy, onyń ishinde astyq saqtaıtyn qoımalardy, astyq keptirgishterdi, astyq tazartý ólsheý quraldaryn, zerthanalardy, tarazylardy jáne taǵy basqa qajettilikterdi tolyq daıyndap, iskerlik tanytqanyn da atap ótýge bolady.
Nan bolsa, bereke men baılyqqa berik negiz qalanady. Osyny eskergen jetisýlyq dıqandar aýa raıynyń qolaıly sátin paıdalanyp, alqaptaǵy qyzý eńbekti jalǵastyrýda.
Kúmisjan BAIJAN,
Almaty oblysy.