Dúnıejúzilik densaýlyq saqtaý uıymynyń ókilderi Úndistanda alapes aýrýynyń asa jyldam jaıylyp otyrǵandyǵyna alańdaýly. Budan alty jyl buryn dertke núkte qoıyldy delingen bolatyn. Alaıda jaǵdaı kerisinshe ýshyǵyp tur.
Osy elde jyl saıyn 120 myń adam alapespen aýyrsa, sonyń 10 paıyzy balalar. DDU úndilik úkimetten aýrýdyń aldyn alý jónindegi sharalardy jyldam qabyldaýy qajettigin eskertip otyr. Birneshe aıdan bastap jyldarǵa sozylatyn aýrý organdardyń ózgerýine alyp kelip, múgedektikke jetkizedi.
Túrkııada áskerı shendiler tutqyndaldy
Túrik soty úkimetke qarsy áreketteri úshin el qarýly kúshteriniń jeti admıraly men generalyn tutqyndaý jóninde sheshim qabyldady. Olardyń arasynda Túrik áskeri oqytý korpýsynyń qolbasshysy general Nýsret Tashdeler men áskerı barlaý qolbasshysy general Ismaıl Pekın de bar.
Áskerılerdiń zańsyz áreketi 2003 jyly ortasha ıslamdyq Ádilettilik jáne damý partııasy bılikke kelgen tusta oılastyrylǵan eken. Qazirgi tańda tutqyndalǵan áskerıler tergelý ústinde. Túrkııa prezıdenti Bas shtab basshysy etip Nedjdet Ozeldi taǵaıyndady. Osylaısha azamattyq úkimet áskerı kúshterdi kim basqaratynyn sheshýge kóshti.
Máskeýde iri órt oryn aldy
Máskeýdiń Mıkoıan et kombınaty aýmaǵynda ornalasqan «Svetmash» zaýyty ǵımaratynda tutanǵan alaý tórtinshi deńgeıdegi órt atanyp otyr.
Eki saǵat ishinde tilsiz jaý on esege deıin órship, eki myń sharshy metrdi jalmaǵan. Ony óshirýge elýge tarta tehnıka men tórt tikushaq jumyldyrylypty. О́rttiń shyǵý sebebi dánekerleý jumystarymen baılanystyrylýda, alaıda ony mamandar anyqtaıtyn bolady.
Reseı basqynshylyǵy aıyptaldy
Grýzııa parlamentiniń spıkeri bosqyndarǵa qaratyp aıtqan sózinde «Reseıge jaýlap alýyn toqtatýyna týra keledi» degendi basa aıtty. Onyń sózine qaraǵanda, Reseı el aýmaǵyn jaýlaý arqyly halyqaralyq quqyqty buzyp otyr. Sondyqtan da óz áskerin Grýzııadan alyp ketýi tıis.
Mundaı málimdemesin Davıd Bakradze 2008 jylǵy oqıǵaǵa úsh jyl tolýyna oraı jasady. Reseı parlamentiniń Ońtústik Osetııa aýmaǵynda áskerı baza ornalastyrý jónindegi zańdyq qujatty ratıfıkasııalaý týraly sheshimine shúılikken spıker AQSh senatynyń Abhazııa men Ońtústik Osetııa jeri jaýlap alynǵany týraly qarary mańyzdy qujat ekendigin jetkizdi.
Bengazıde úkimet aýysty
О́tpeli ulttyq keńes Kaddafımen baılanysy bar dep aıyptalǵan kóterilisshiler qolbasshysy Abdel Fattah Iýnestiń óliminen eki apta ótisimen Bengazıde ózi qurǵan úkimetti kóptegen kemshilikterge baılanysty taratty.
Atqarý komıtetiniń keıbir músheleri jumysynda kemshilikter baıqalǵandyqtan, keńes jańa úkimetti jasaqtaýǵa kirisip te ketken. Iýnes shildeniń aıaǵyna taman belgisiz bireýlerdiń qolynan qaza tapqan bolatyn. Keıbir BAQ ony kóterilisshilerdiń ózi óltirýi múmkin degen-di. О́tpeli ulttyq keńes basshylyǵy mundaı daqpyrtty Kaddafı jaqtastary ádeıi taratýda deıdi.
Analyq jasýsha saqtaýǵa alyndy
Izraıldiń otbasylyq ister jónindegi soty jaqynda qaza bolǵan 17 jasar qyzdyń otbasyna onyń analyq jasýshasyn medısınalyq bankte saqtap qoıýǵa, artynan ony donorlyq maqsatta paıdalanýǵa ruqsat berdi.
Sharon aımaǵynyń turǵyny Hen Aıda Aıısh osydan bir jarym apta buryn avtokólik apatynan zardap shekken-di. Ony jedel aýrýhanaǵa jetkizgenimen, dárigerler mıdyń óli ekendigin anyqtaǵan. Otbasy qyzdyń organdaryn donorlyq maqsatqa paıdalanýǵa óz ruqsattaryn berip, tórt adam ajal aýzynan qutqarylypty. Osy rette qyz otbasy analyq jasýshany ólgen erkek spermasymen uryqtandyrýdy ótingen. Alaıda sot tek saqtaýǵa ǵana ruqsat berip otyr.
Qysqa qaıyryp aıtqanda:
* Daǵystanda oryn alǵan jappaı tóbelesten alty adam qaza taýyp, taǵy bir polıseı qyzmetkeri atyp óltirilgen. Oqıǵa túngi 01:00 shamasynda qarý qoldaný jaǵdaıynda oryn alǵan. Bir apta buryn Ýnsýkýl aýdanynda avtokólik jarylyp, úsh adam qaza tapqan-dy.
* Belorýssııada negizgi azyq-túlik – nan, sút, et jáne sút ónimderine degen baǵa taǵy 5 paıyzǵa kóterildi. Eldegi bul jyl basynan bergi jetinshi ret baǵanyń ósýi. Eger jaǵdaı ýshyǵyp jatsa, onda baǵany retteý qolǵa alynady. Ázirge bul Reseı men Qazaqstan arasyndaǵy baǵalyq alshaqtyqtardy jaqyndatý maqsatynda júzege asyp otyr.
* AQSh qor bırjalaryndaǵy saýda 5,40-6,80 paıyzdyq tómen kórsetkishpen jabyldy. Mysaly, NASDAQ joǵary tehnologııalyq kompanııasy 6,83 paıyzǵa tómen syrǵysa, S&P 500 6,66 paıyzdyq tómen kórsetkishke ıe boldy.
* Sırııa prezıdenti Bashar Asad Alı Habıbany qorǵanys mınıstri qyzmetinen bosatyp, ornyna Daýd Radjhany taǵaıyndady. Buǵan deıin Sırııa bıligi tarapynan kóterilisshilerdi aıaýsyz janshýmen kelispegen Bahreın, Saýd Arabııasy men Kýveıt óz elshilerin shaqyrtyp alǵan bolatyn.
Internet materıaldary negizinde ázirlendi.