Keshe Astanada Qazaqstan halyqtyq kommýnıstik partııasy ortalyq komıtetiniń qoǵamdyq tyńdalymdary ótti. Oǵan atalǵan partııanyń elimizdiń ár óńirindegi belsendi músheleri qatysty.
Kún tártibine birneshe máseleler qoıyldy. Olardyń ishinde turǵyn úı-kommýnaldyq sharýashylyǵynyń jumystary, kommýnaldyq qyzmetke tólemder, qoǵamdyq kólikterde júrý aqylary syndy máseleler talqy tarazysyna tústi. QHKP OK birinshi hatshysy Vladıslav Kosarevtiń aıtýynsha, qoǵam memlekettik organdarǵa eldegi monopolısterdiń baǵany tym sharyqtatyp jiberý úderisimen kúresýge kómektesýi qajet. Bul jerde halyqtyń kúsh-jigeri aıtarlyqtaı mańyzǵa ıe bolmaq.
– Búgingi otyrys barysynda qyzyqty usynystar men pikirler aıtyldy. Biz olardyń barlyǵynyń basyn bir qujatqa biriktiretin bolamyz. Odan keıin atalǵan qujatty tıisti organdarǵa, sondaı-aq, Úkimet pen Memleket basshysynyń nazaryna tikeleı usynǵaly otyrmyz. Sol arqyly el ishinde jańa ózgeristerdiń oryn alǵanyn kózdemekpiz. Sebebi, mundaı qadamdar eń aldymen, qarjylyq resýrstardyń tıimsiz paıdalanylýyna shekteý qoıýǵa muryndyq bolady. Ekinshiden, kommýnaldyq tarıfterdi jónsiz joǵarylatý kerek pe, joq pa degen saýalǵa jaýap izdeýge sep bolmaq, – dedi V.Kosarev. – Bul rette, biz atalǵan qyzmet túrlerine baǵanyń ósirilýine qatysty 2 jyldyq merzim kóleminde moratorıı jarııalaýdy usynamyz.
V.Kosarevtiń pikirinshe, kommýnaldyq monopolıster óziniń jumysyna aqy alý úderisin júrgizýde eshqandaı sheńberge syımaıtyn, keıde zań talaptaryna sáıkes kelmeıtin saıasatty basshylyqqa alýdy ádetke aınaldyrǵan. Osy oraıda, partııanyń birinshi hatshysy mundaı zańsyz úderisterge baǵyttalǵan moratorııdi respýblıkalyq kólemde ótkizý qajettigine toqtalyp ótti. Sondaı-aq, ol qazaqstandyq azamattardy zań talaptaryna qaıshy áreket etetin halyqqa qyzmet kórsetý mekemeleriniń jumysyna birlese tosqaýyl qoıýǵa shaqyrdy.
«Egemen-aqparat».