J.Bekshe jeltoqsan aıynda Ekaterınbýrg qalasynda ótken halyqaralyq jarysta eresekter arasynda 200 jáne 400 metr qashyqtyqqa júzip, 2 altyn, 1 qola júldege qol jetkizipti. Balǵyn sportshy Temirtaýda, Pavlodarda, Tarazda ótken respýblıkalyq jarystardan da jeńispen oralǵan.
Gazetimizdiń tilshiler qosynyna qol jetkizgen jeńisimen qanattanǵan taldyqorǵandyq jas sportshy Jumaǵalı Bekshe habarlasty. Jetkinshektiń áje-atasynyń qýanyshynda da shek joq. “Shańyraq” shaǵyn aýdanyndaǵy sportta daryndy balalarǵa arnalǵan mektep-ınternatynda sýda júzý sportymen 2006 jyldan beri jattyǵyp júrgen jastyń búgingi jetistigi aıtarlyqtaı. Ol júzýden elimizdegi jastar men jasóspirimder arasynda chempıon rekordshy bolsa, Tokıoda ótken Azııa chempıonatynda da jaqsy nátıjelerge qol jetkizgen. J.Bekshe jeltoqsan aıynda Ekaterınbýrg qalasynda ótken halyqaralyq jarysta eresekter arasynda 200 jáne 400 metr qashyqtyqqa júzip, 2 altyn, 1 qola júldege qol jetkizipti. Balǵyn sportshy Temirtaýda, Pavlodarda, Tarazda ótken respýblıkalyq jarystardan da jeńispen oralǵan. – Kúnshyǵys eliniń astanasy Tokıoda ótken Azııa chempıonatyna qatysýyma birden-bir sebepker ári armanyma qanat bitirgen – oblys ákimi Serik Úmbetov aǵanyń yqylasy. Dodaly básekege qatysýǵa ekiniń biriniń qoly jete bermeıdi. Osyǵan deıin kóp kedergilerge kezdestim. Sonyń biri qarjy tapshylyǵy. Jolym bolǵanda salamatty ómir salty men sportty súıetin, talantty jasqa senim artatyn jannyń demegenin umytpaımyn. Úmitti aqtaýǵa talaptandym. Elimniń dańqyn asyrǵan chempıondarǵa eliktedim. Nátıjesinde jeńispen oralyp, úsh birdeı qola medalǵa qolym jetti. Men úshin ol altynnan da qymbat. Qazir ózimniń negizgi erkin stılmen júzý qashyqtyǵyma jattyǵýdamyn. Bul qashyqtyqta 1980 jyldan beri jasóspirimder arasynda halyqaralyq rekord jańartylmapty. Maqsatym – sony ózgertip, elimniń kókbaıraǵyn jelbiretý, Otanyma degen perzenttik paryzymdy óteý, ózime júktelgen senim bıiginen kóriný, – deıdi balǵyn sportshy. Halqymyz: “Mergenniń kózi de mergen, qoly da mergen” degen ǵoı. Al, ony dáleldep, sýda balyqsha júzgen, qanaty qataıyp, alǵashqy jeńisimen jigerlengen Jumaǵalı Bekshe Elbasynyń jastarǵa artqan seniminen shyǵýǵa bar kúsh-jigerin jumyldyratynyn, jarystarda básekelesteriniń aldyńǵy shebinde bolatynyn da senimmen aıtty. Osy oraıda jankúıerlerdiń talapty jasqa sáttilik tilep, árdaıym jarystarda taýynyń shaǵylmaýyna tilektes ekenin de aıtqanymyz jón.
Kúmisjan BAIJAN,
Almaty oblysy.