Táýelsizdiktiń jıyrma jyly ishinde Elbasynyń eren eńbeginiń arqasynda elimiz eńseli asýlardan asty. Memleket basshysynyń syndarly saıasatymen demokratııanyń dańǵyl jolyna túsken elimiz ekonomıkalyq, mádenı, quqyqtyq, jalpy, qaı salada bolmasyn, halyq kútken nátıjege qol jetkizdi. Sonyń biri quqyq qorǵaý qyzmetinde ashyqtyqtyqty, jarııalylyqty júzege asyrý bolatyn. Bul qazir naqty is barysynda kórinis taýyp otyr. Máselen, taıaýda Kóliktegi polısııa qyzmetine baqylaý jasaý jónindegi qoǵamdyq keńestiń otyrysy ótti. Sonda IIM Kóliktegi IID qyzmet kórsetetin ýchaskelerindegi qoǵamdyq oryndarda spırtti ishimdik ishý máselesin sheshýdegi eń úzdik usynysqa ashyq baıqaý jarııalady. Sol-aq eken Qoǵamdyq keńestiń elektrondy mekenjaıyna ár túrli usynystarmen barlyǵy 32 000 habarlama kelip túsken.
Keńeske tóraǵalyq etýshi IIM Kóliktegi IID bastyǵynyń orynbasary polısııa polkovnıgi E.Isabekov, shyndyǵynda azamattar tarapynan mundaı kóptegen oń pikirlerdiń aıtylatynyn kútpegen edik, deıdi. Sonyń ishinde Molokov Vıacheslav degen azamat jolaýshylar úshin salynǵan tyıymdy buzýshylarǵa aıyppul sharalary engiziletin amal usynypty. Eger jolaýshy vagonda alkogoldi ishimdik ishse oǵan aıyppul baldary tirkelsin, ol odan kelesi bılet satyp alý kezinde bılet qunyna eseptelip qosylatyn bolsyn. Iаǵnı, eger sen tártipti buzsań, sen úshin kelesi jol júrgen kezde ol ósip otyrady. Qansha ret tártip buzsań sonsha ret ball sany artyp otyrady jáne bılet quny joǵarylaı beredi. Osyndaı shara qoldaný jolaýshylardyń poıyzda nemese tikushaqta ishimdik ishýge degen yqylastaryn azaıtady, deıdi.
Al Orazbaev Ermek degen azamat alkogoldi ishimdikti ońaı satyp alatyn «vagon-meıramhana» ataýyn ózgertý kerek deıdi. «Vagon-meıramhana» ataýyn, mysaly: «vagon-balmuzdaq», «vagon-dámhana» jáne t.s.s. ataýlarǵa ózgertý. Eger olar ár túrli bolsa – bul ár bir poıyzǵa ózindik erekshelik beredi jáne eń úzdik poıyz quramy degen saıys uıymdastyrýǵa bolady. Sol sııaqty taǵy bir azamat tártip buzýshylardyń bıletterine «ishimdik iship jáne laıyqsyz minez-qulyq kórsetti» degen mórdi qoıý qajet, óıtkeni jolda kóp ishetinder issaparǵa shyǵýshylar, demek issapardan kelgen soń olar bıletterin ótkizýi kerek, álbette olarǵa mundaı bıletti tapsyrý yńǵaısyzdyq týdyrar edi, deıdi. Sóıtip jolaýshylardyń usynymdaryn saraptaı kele kóliktiń ýaqytsha aıaldamasy kezinde algogoldi ishimdikti jolaýshylardyń satyp alýyn tómendetý úshin áýe, temir jol vokzaldary mańynda alkogoldi zattardy satýǵa tyıym salý jáne otyrǵyzý barysynda, jolaýshylardy mindetti túrde alkotester quraly arqyly alkogoldik masańdyqqa tekserý kerek degen negizgi pikirler aıryqsha nazarǵa alyndy. Árıne, bul usynystar áli talaı zerdelenedi. Degenmen halyqtyń mundaı usynystary birinshi kezekte quqyq buzýshylar sanyn aıtarlyqtaı qysqartady, qoǵamdyq tártipti nyq saqtaýǵa múmkindik beredi jáne jolaýshylardyń qaýipsizdigin qamtamasyz etýge septigin tıgizedi, deıdi kóliktegi saqshylar.
Aleksandr TASBOLATOV.