«Meniń Qazaqstanym» poıyzynyń jurtshylyqpen júzdesýi jalǵasýda

El Táýelsizdiginiń 20 jyldyq torqaly toıyna tartý retinde jol­ǵa shyqqan «Meniń Qazaq­stanym» arnaıy poıyzyndaǵylar belgilengen baǵyttary boıynsha Qostanaı oblysynyń Rýdnyı qa­lasy, Sol­tús­tik Qazaqstan obly­sy­nyń Ta­ıyn­sha aýdany, sondaı-aq Qaraǵan­dy oblysynyń Temirtaý qalasy men Jańaarqa aýdan­dary stansa­laryna taban tirep, jergilikti jurt­pen júzdesti. Atal­ǵan jerlerde olardy jergilikti bılik ókil­derimen birge, turǵyndar saltanat­ty jaǵdaıda kútip aldy. Arqalyqtan bet alǵan arnaıy poıyz Rýdnyı qalasynyń vok­zaly­na kelgende kútip alýshylar sa­nyn­da esep bolmady. Poıyzdy asyǵa kútken qala jurtshylyǵy aldynda sóz alǵan «Nur Otan» HDP Orta­lyq apparatynyń ar­naıy ókili Qaz­bek Qazkenov «Me­niń Qazaq­stanym» poıyzynyń maq­saty ja­ıyn taǵy bir py­syq­tap ótse, Rýd­nyı qalasy ákiminiń oryn­basary Ábdirahman Eshmu­han­­betov Astanadan atbasyn tiregen qaýymǵa rıza­shylyǵyn jetkizdi. Halyq úshin dep Táýel­siz­dik­tiń 20 jyldyǵyna oraı daıyn­dal­ǵan bul poıyzdaǵy mádenı is-sharalar men turǵyndardyń talap-tilekteri boıynsha júrgizil­gen zańdyq ke­ńes­ter kópshilik kóńi­linen shyǵyp, olardyń sol saladaǵy ózderin tolǵandyrǵan túrli máselelerden maǵlumattar alýyna mol múmkin­dikter berse, osy kúni tústen keıin «Rýdnyı daýysy» radıosy bul poıyz ja­ıynda tikeleı efır ha­baryn uıymdastyrdy. Rýdnyı qalasynda búginde túr­li salalar boıynsha irgeli ju­mys­tar júrgizilýde eken. Olar­dyń qatarynda «100 mektep, 100 aýrýhana» baǵdarlamasy boıyn­sha 900 oryndyq №7 qazaq orta mektebi men jalpy sany 170 balaǵa arnal­ǵan qalalyq balalar aýrýhanasy kesheniniń ǵımarat­tarynyń paıda­lanýǵa berilgenin aıtýǵa bolady. Sondaı-aq, turǵyn úı-kommýnaldyq sharýashylyq salasynda da birshama jumystar atqarylypty. Alpys jylǵa jýyq tarıhy bar bul shaǵyn shaharda 130 myńǵa jýyq halyq tursa, 12 mektepke deıingi balalar mekemesi men 23 orta mektep, sony­men qatar, 1 joǵary oqý orny, 4 kol­ledj, 3 kásiptik lıseı bilim ala­myn degen jasqa óz qyzmetterin usynýda eken. О́ndi­risti qalanyń ónerkásip salasy da jaqsy deń­geı­degi kórsetkish­termen tolyǵýda. Munan keıin «Meniń Qazaq­stanym» arnaıy poıyzyn Sol­tús­tik Qazaqstan oblysynyń Ta­ıyn­sha aýdany turǵyndary qarsy aldy. 12 myńnan astam halyq tu­ra­tyn aýdan ortalyǵynyń má­de­nıet úıinde «Nur Otan» HDP Or­talyq apparatynyń ókilderi men Nurǵalı Núsipjanov, Aıjan Nur­maǵambetova syndy óner tar­lan­dary arnaıy júzdesýler ótk­i­zip, 20 jyldaǵy jetistikterimiz ja­ıynda oı bólisti. Sonymen bir­ge, poıyzdaǵy medısına sala­sy­nyń ókilderimen birge jumys jasaǵan Aqmola oblysynyń dárigerleri aýrýyna em izdegen 70-ke jýyq jandy qarap, keńes­terin usyndy. Osy rette aýdan turǵyndary Rústem Ábdirashevtiń «Balalyq shaǵymnyń aspany» jáne Danııar Salamatovtyń «Báı­terek» kınolentalaryn kórip, ta­mashalady. Taıynshalyqtar men aýdan qo­naqtaryn keshkisin bolǵan estrada juldyzdarymen ótken dýmandy konsert erekshe kóńil-kúıge bó­ledi. Kúni buryn habarlanǵan bul keshke Kókshetaý qalasynan ar­naıy kelgen Qýanysh Maǵzumov­tyń qýanyshynda shek bolǵan joq. «Qazaq ánshileri keledi eken degendi estigende, ásirese, sonyń ishinde zamandastarym Nurǵalı Núsipjanov pen Altynbek Qoraz­baev bar degen habar qulaǵyma tıisimen úıde jata almadym. Almatyǵa, Astanaǵa baryp konsert kórýge rasy kerek, eldegi aǵaıynnyń qaltasy kótere bermeıdi ǵoı. Sol úshin osyndaı shara uıymdastyryp, dúıim jurt­tyń kóńilin serpiltýge uıytqy bolǵan «Nur Otan» partııasyna alǵysym sheksiz. Munyń bári de, saıyp kelgende, egemendigimizdiń arqasy ekeni daýsyz. Sondyqtan da táýelsizdigimizdiń tuǵyry bıik bolǵaı!» – degen aqjarma tilegin jetkizdi aqsaqal. Temirtaýlyqtardyń da bul poıyzdy asyǵa kútkendikterin ańǵarý qıyn emes edi. Saltanatty jaǵdaıda kútip alýdaǵy asqan qonaqjaılyq osynyń dáleli. Túr­li sala boıynsha kelgen mamandar ishinde Ulttyq bank ókili Quman Sadyqov turǵyndarǵa nesıe alýdyń alǵysharttaryn túsin­dirip, olardyń suraqtaryna jaýap berýi men «Nur Otan» HDP ókilderiniń turǵyndarmen alýan máseleler tóńireginde oı órbi­tý­leri de eshkimdi de beı-jaı qal­dyr­mady. Sondaı-aq Roza Rym­baeva, Jeńis Seıdollauly, Jazıra men Janbolat, Álisher Karımov jáne Jubanysh Jeksenuly syndy óner sańlaqtarynyń konserttik baǵdarlamasyn qala jas­tary asqan rızashylyqpen tyń­dap, erekshe qurmetterin kórsetip jatty. Án men jyrdyń mekeni, Sá­ken­deı aqyn serini, dańqty sport­shylardy ómirge keltirgen Jańa­ar­qa jurtshylyǵynyń «Meniń Qazaqstanym» poıyzyn kútip alýy delegasııany erekshe sezimge bóledi. Munda da baǵdarlamaǵa sáı­kes poıyzdaǵy partııa ókilderi men mamandar óz jumystaryna kirisip ketti. «Nur Otannyń» qo­ǵam­dyq qabyldaýlary partııanyń Jańaarqa aýdandyq fılıalynda ótse, ózge zańdyq keńester Sáken Seıfýllın mektebinde jalǵasyn tapty. Áleýmettik qamsyzdan­dy­rý men bank salasyndaǵy keńes alýshylar sany munda da az bol­mady. Máselen, shaǵyn jáne orta kásipkerlikti damytý baǵy­tynda nesıe alý jaıynda keńes suraı kelgen jeke kásipker, kóp balaly ana Baǵy Isına da bul poıyzdy kútkenin aıtsa, Eńbek jáne ha­lyqty álýmettik qorǵaý mınıstrliginen bólingen maman Gúl­zıra Sálemova 22 adamnyń qa­byl­­daýyn­da bolǵanyn jáne olar­dyń deni jumyspen qamtý, áleýmettik kómek, zeınetaqy mól­sheri jaıyn­da ke­ńes­ter alýǵa kelgenin jetkizdi. «Meniń Qazaqstanym» arnaıy poıyzynyń is-sharasy keshe keshkisin ortalyq Táýelsizdik saıabaǵyn­daǵy estrada juldyzdarynyń gala konsertimen óz jalǵasyn tapty. Ábdirahman QYDYRBEK. Sýretterdi túsirgen Quralaı  ShERIIаZDANOVA.