Memleket basshysy Nursultan Nazarbaev pravoslavıelik hrıstıandardy jáne barsha qazaqstandyqtardy jarqyn meıram – Rojdestvo merekesimen quttyqtady. Bul mereke – adamzattyń jaqsylyq, meıirimdilik, esirkeý jáne súıispenshilik sııaqty aınymas asyl qundylyqtarynyń belgisi, delingen Elbasy quttyqtaýynda.
Qazaqstanda pravoslavıe eń kóp taraǵan konfessııanyń biri bolyp tabylady. Orys pravoslavıe shirkeýi memleket pen dinı birlestikterdiń arasynda oń qarym-qatynastardyń damýyna, qoǵamymyzda beıbitshilik pen kelisimniń nyǵaıýyna úlken úles qosyp keledi. Bul tereń qurmetke jáne qadirleýshilikke laıyq. Bizde Rojdestvonyń Qurban aıtpen birge demalys kúni bolyp jarııalanǵany kezdeısoqtyq emes. Pravoslavıe dinbasylary men din ókilderi óz qyzmetteri men senimderi aıasynda ózge de barlyq konfessııa ókilderimen birge elimizdiń damýyna, onyń yrys-baılyǵynyń artýyna rýhanı úles qosyp, tózimdilik pen túsinistik tanytýda. Orys pravoslavıe shirkeýi – elimizde ótken Álemdik jáne dástúrli dinder kóshbasshylarynyń sezine belsendi qatysýshy. Búginde biz eleýli oqıǵanyń qarsańynda turmyz. Meniń shaqyrýym boıynsha birneshe kúnnen keıin Qazaqstanǵa Búkil Reseı jáne Máskeý Patrıarhy Kırıll minájattyq saparmen keledi. Bul sapar elimiz ómirindegi aıryqsha oqıǵaǵa aınalyp, tek pravoslavıelikterdiń ǵana emes, barlyq qazaqstandyqtardyń rýhanı dúnıesin nyǵaıta túsedi dep senemin. Rojdestvo merekesi úmit kútken mıllıondaǵan adamdardyń úıine qýanysh pen jaqsylyq ákeledi. Ol qazaqstandyqtardy biriktirip, ar-ojdanyn ornyqtyryp, qoǵamdaǵy kelisimdi nyǵaıtady. Bul – kómek pen qamqorlyqqa muqtaj adamdardyń barlyǵyna shynaıy turǵyda kóńil aýdarylatyn qaıyrymdylyq pen meıirimdilik kúni. Osy mereke barlyǵyńyzǵa qýanyshty kóńil-kúı, shynaıy mahabbat pen dostyq, bıik rýhanı baılyq ákelsin! Barshańyzdy Rojdestvo merekesimen quttyqtaımyn! Sizderge, qymbatty meniń otandastarym, zor densaýlyq, beıbitshilik, tynyshtyq jáne ıgilik tileımin, delingen Elbasy quttyqtaýynyń sońynda.