Jol basy jobalaýdan bastalady

Buryn da kóz tartarlyq Kók­she­taý sońǵy on jylda aıryqsha túrlenip, gúldenip keledi. Qala­nyń basty jasaýy  zamanalyq reńktegi ǵımarattar desek bola­­dy. Bárimiz qurylysshylarǵa qol soǵamyz. Bul durys. Biraq, kez kelgen qurylys jobalaýsyz bas­talmaıtyny da anyq qoı. Ǵımarattarǵa til bitse, ne der edi? Máselen, eń ádemiler sana­tyndaǵy «Kókshetaý» mádenıet saraıy men Sh.Qusaıynov atyn­da­ǵy qazaq mýzykalyq drama teat­ryn, «Drýjba» kınoteatryn, «Torpedo» stadıonyn, ortalyq mádenı-demalys baǵyn alaıyq. Qa­lalyqtardyń bar qýanyshy, shy­ǵarmashylyq sheberlik, jas Birjan men Aqandardyń arman-tilegi osynda. Osy bir-eki jylda paıdalanýǵa berilgen zamanalyq «Býrabaı» ámbebap sport kesheni­niń de rýh tasqyndatar ápsanasy bar. Nemese, «Qazaqtelekom» AQ ákimshilik ǵımaratynda 10 myń­nan astam metall-karkas quryl­ǵy­lar men keskindemeler qolda­nyl­ǵany ájeptáýir áńgimege ar­qaý bolatyndyǵy túsinikti. Elimizdegi tuńǵysh prezıdenttik 1200 oryndyq mektep, «100 mektep, 100 aýrýhana» baǵdarlamasyn­da­ǵy nysandar, Býrabaıdaǵy res­pýblıkalyq shańǵy bazasy, perzanthanalar, balalar baqshasy, saýda jáne oıyn-saýyq otaýlary, medısınalyq ońaltý jáne qan ortalyǵy, kóptegen turǵyn úıler el ıgiligindegi nysandar. Jýyr­da­ǵy qala kúninde Kókshetaýdaǵy «Dızaın ortalyqtyń» sońǵy 10 jyldaǵy 100 jobasynyń tanys­ty­rylymy ótkizildi. Munyń bar­lyǵy qazir qoldanystaǵy ǵıma­rat­tar. Al, bolashaqtyń joba syzbalarynyń jóni de, aıtar áni de bólek. Bıylǵy Qurylysshylar kú­nin­de respýblıkamyzdyń qur­met­ti sáýletshisi Býrabaı Maramov basqaratyn «Dızaın orta­lyq» JShS óziniń 10 jyldyǵyn atap ótti. Mundaıda ótkenge, atqa­ryl­ǵan isterge baǵa beriletini bar. Bul oraıda da shyǵar­ma­shy­lyq ujymnyń júzi jar­qyn degimiz keledi. Kúni keshe seriktes­tiktiń bas ınjeneri, birneshe me­daldiń ıegeri Tomıla Dýdko respýb­lıkalyq kásip­odaq­tar keńe­siniń «Mamandyǵy boıynsha úz­dik» belgisimen, bir top qyzmet­ker gramotalarmen marapattaldy. Al, Sáýle Tásh­kınanyń omy­raýynda «QR qur­metti sáýlet­shisi» belgisi jarqy­ra­sa, jas sáýletshiler Alla Isanına men Qanat Balkeshev Kókshetaý qala­synyń gerbi men emblemasynyń avtorlary retinde qurmetke bó­lengen. Jurtshylyq, sondaı-aq, or­ta­­lyqtyń táýelsiz memleketi­mizdiń ýaqyt kúttirmes mindetterin jú­zege asyrýǵa kúsh sala­tyn qajyr-qaıratyna erekshe rızashylyq bildirýde. Mynany qarańyz, úde­meli ındýstrııa­lyq-ınnovasııa­lyq baǵdarlama sheń­berindegi óńir­degi mańyzdy ny­san­dardyń barly­ǵynda derlik maqala keıipker­leriniń qol­tań­ba­sy aıshyqtalyp kórinedi. Qa­zaq­stannyń soltústik aıma­ǵyn­da teńdesi joq «ENKI» keramı­ka­lyq kirpish zaýy­ty­nyń, «Kókshe­taýmıneral­dysý­lary» JShS, ataqty «Altyn­taý-Kók­shetaý», «KamAzInjınırıng», «О́rken-Atansor», «Aq­­saı Nan» aksıonerlik qo­ǵam­darynyń óndi­ristik ny­san­dary oblys aby­roıyn asy­ryp jatsa, munda kók­shelik joba­laý­shy mamandardyń sal­maqty úlesi bar. «Dızaın orta­lyq» ǵımaratynyń ózi de ádemi. Qa­shanda tapsyrys berýshilerden arylmaıdy. – Báke, seriktestiktegi 47 qyz­metkerdiń júktemesi kóp kórindi, osynshama jumystyń údesinen shyǵý qıyn emes pe, degen suraq qoıdym ujym basshysyna. Jaýap tereń boldy. Qıyndyq basqada eken. JShS dırektory qalyptasý kezeńindegi aýyrtpa­lyqtar men qazirgi kezeńdegi kedergilerdi mysalǵa aldy. Týra búginginiń máselesi. Kadrlar qar­taıyp barady. Qurylystardyń qarqyny baıaýlaýyna baılanysty kásiptik ınstıtýttar jabyla bas­tady. Biraq, qurylyssyz qoǵam damymaıdy. Burynǵy jobalaý ınstıtýtynyń ınjeneri Býrabaı Maramov elý jasynda jeke menshik uıym qurýǵa bel baılaǵan. Bilikti mamandar bazar jaǵalap, bilgenin umyta bastaǵan. Buryn­ǵydaı bir úlgidegi jobalaý degen joq, ár nysannyń óz ereksheligi bar. Kompıýterlik grafıka, kúr­deli baǵdarlamalardy keńes kezindegi maqtaýly mamandardyń ózi alyp kete almaı jatty. Qu­rylys ındýstrııasy tyǵyryqqa tirelgendikten monolıtti quryl­ǵyǵa negizdelgen materıaldar men jabdyqtar syrttan tasymal­dandy. Túrli sıpattaǵy ǵımarat­tardy osyǵan sáıkes jobalaý kóp bilimdi talap etedi. Kelip jatqan jastardyń tájirıbesi joq. Sa­qamyz da, jasymyz da ózin-ózi oqytý mektebinen óttik. Bul problema qazir de bar. – Ekinshiden, jobalaýǵa tap­syrys ýaqyty tym tyǵyz, – deıdi Býrabaı Maramuly. Onyń ústine, tenderdi utyp alǵannan keıin bizdiń jobamyzben kelisý úshin saraptamanyń bes-alty túri júr­giziledi. Ýaqyttan utylamyz. Aıyp sanksııasy retinde topog­rafııalyq, geologııalyq, ekolo­gııa­lyq, taǵy basqa saraptama­lardy qosa atqarýǵa týra keledi. Tapsy­rys berýshi nemese ókiletti organ bul mindetterdi arnaıy qury­lym­darǵa júkteýine bolady ǵoı. Kásipker­lik­ti qol­daý degenimiz osy emes pe? Iá, jol basy jo­­balaýdan bas­ta­lady. Jo­ly­myz áman­da ashyq bolǵaı. Baqbergen AMALBEK. Aqmola oblysy.