Ardager jýrnalıst Orynbaı Tasybekovtiń “Meniń zamandastarym” atty jańa shyqqan kitabyn áriptestik qyzyǵýshylyqpen qolǵa alǵanbyz. Áýeli Jambyl oblystyq “Eńbek týy” gazetiniń qazanynda shyńdalǵan, odan soń uzaq ýaqyt aýdandyq gazetterde redaktor bolyp qyzmet etken, bir aýyq respýblıkalyq “Qaınar” baspasy men “Qazaqstan kommýnısi” jýrnalynda da qalam qaıratyn tanytqan avtordyń óreli ómir jolynan, baspasózdegi shyǵarmashylyqtyń qıly da qıyn soqpaqtarynan ótkeni ańǵarylady.
Kitapqa avtordyń ár jyldary jazǵan shuraıly maqalalary, ocherkteri men pýblısıstıkalyq tolǵanystary toptastyrylǵan eken. Solardy oqı otyryp, Orekeńniń qazaq jýrnalıstıkasyna tolaıym adaldyǵyn eljireı sezinesiz. Kitaptyń aty aıtyp turǵandaı, úlken-kishimizge birdeı ortaq zamandastarymyzdyń qıly-qıly ómir ótkelderin kózaıymdap, alýan-alýan qyzyq taǵdyrlardyń kýási bolasyz. Olardyń árqaısysy ózindik minez-qulyqtarymen, is-áreketimen, qınalys-tolǵanysymen, qýanysh-súıinishimen este qalady.
Aýdandyq gazet – jýrnalıstıkanyń eń bir kúrdeli býyny. Bul býynnan qazaq baspasóziniń talaı-talaı tarlan qaıratkerleri ósip shyqqanyn bilemiz. Orynbaı Ábdirahymulynyń da naq osy saladaǵy eńbeginiń usynar ǵıbraty moldyǵy myna kitaptyń árbir paraǵynan paryqtalyp ta, paıymdalyp ta tanylǵandaı. Jınaqqa epıgraf retinde alynǵan Ábdirahym áke ósıeti de kóńilimizdi bir tolqytyp ótti. “Qazaqta ezýinen enshi bergen” degen bir jaqsy sóz bar. Enshi otaý bolǵanda ata-anańnan alǵan mal-múlik, dúnıe-pul emes, mańdaıyńnan sıpaǵan jyly alaqan, báıgege túskende qıqý salǵan demeý, toryqqanda aýzyńa tamyzylǵan bir jutym sý. Sony jasaǵan adamdardy kóziń jumylǵansha umytpaı, qurmet tut, balam” – degen osynaý áke ósıetine de qalamger perzent adaldyǵynan jazbapty. Sebebi, onyń árbir tolǵanysynda adamdarǵa degen sheksiz qurmet pen iltıpat, týǵan jerge degen meıirli súıispenshilik pen ińkár sezim tunyp turǵanyn baıqar edińiz. Shalymdy jýrnalıst Sáken Seıfýllınniń tar jol, taıǵaq keshken kezeńderde Moıynqum óńirinde bolǵandyǵy jaıly ádemi oı tolǵaıdy. Osy aýdanǵa ańshylyqqa kelgen kezdegi Ǵabıt Músirepovtiń syrbaz minezderinen syr aýlaıdy. Kenen atasynan bata alǵan sátin babymen baıandap bir ótedi. Qazaqtyń kıeli qarttarynyń biri Jazylbek Qýanyshbaev, Moıynqumnyń arda azamaty Aıtbaı Nazarbekov jaıly aǵynan aqtarylǵan rııasyz kóńili qandaı. Orekeń shymyr tolǵamdarynyń bir parasyn shtattan tys tilshimiz retinde “Egemenniń” betinde de jarııalaǵan.
Ol birde Parıjge barǵan saparyn tamsandyra áńgimelese, endi birde óz Astanamyzdyń tórinde turyp tebirenedi. Baıtaq Saryarqadaǵy Qýly, Muńly taýlarynyń jan terbeter jumbaǵyna boılatady. Sóıtip, oqyrmanyn oılantady. Jalpy, jýrnalıst jazbalaryna parasattylyq pen paıymdylyq tán. Soǵan oraı biz de Orynbaı Tasybekov týraly “eldik sózdiń eńbektorysy eken-aý” degen pikirimizdi tastúıin bekite tústik.
Qorǵanbek AMANJOL.