Ońaı jolmen paıda tabýǵa qumartyp, qylmysqa baratyndar tepse temir úzetinderdiń ǵana emes, múgedek jandar arasynda da kezdesýde. Almaty qalasynyń 43 jastaǵy turǵyny Murat Esenov birinshi toptaǵy múgedektigine qaramaı, qylmystyq árekettermen aınalysýdy ádetke aınaldyrǵan. Ol Almaly aýdanynda turatyn tanystaryn da jáne ózgelerdi de «arzan baǵamen» noýtbýk alyp beremin, sóıtip sender birshama aqshalaryńdy únemdeısińder» dep, birqatar qarajat jınap alǵan. Jarty jyldan astam ýaqyt ózgelerdi qurǵaq ýádemen toıdyrǵan alaıaq jaqynda quryqtaldy. Múgedek adamǵa músirkeýshilikpen qarap, onyń ózderin aldamaıtynyna sengen jandar bolsa oǵan bergen qomaqty qarajatyn qaıtara almaı álek.
Eki baldaqpen ázer qozǵalatyn múgedek-aıypkerden jaýap alý kezinde birqatar kóleńkeli jáıttiń beti ashyldy. Ol ózgelerden alaıaqtyq jolmen aldap alǵan aqshany túgeldeı derlik esirtki satyp alýǵa jumsaǵanyn aıtty. Tańǵalarlyǵy, osyndaı óreskel isine qınalyp, qynjylyp, ókinish te bildirmeıdi. Sóıtse on jyl boıy esirtkimen áýestengen Murat Esenov budan buryn da esirtki satý jáne urlaý jónindegi qylmysy boıynsha jeti ret jaýapqa tartylyp, sottalǵan, – deıdi Almaly aýdandyq IIB bastyǵynyń orynbasary, polısııa podpolkovnıgi Bolat Muhanbetov.
Baqyt BALǴARINA, Almaty.