El Táýelsizdiginiń 20 jyldyǵy qarsańynda Elbasy N.Nazarbaevtyń uıǵarymymen Kók túrikterdiń altyn besigi – kóne, kıeli de qasıetti ór Altaıda osyndaı taqyryppen halyqaralyq ǵylymı-tájirıbelik konferensııa tuńǵysh ret ótpek.
Keshe О́skemendegi baspasóz klýbynda – TÚRKSOI-dyń Qazaqstandaǵy ókili Asqar Turǵanbaev, Shyǵys Qazaqstan oblystyq mádenıet basqarmasynyń bastyǵy Jaqsylyq Omar, Qyrǵyzstan jáne Reseıden kelgen fotojýrnalısterdiń qatysýymen baspasóz máslıhaty bolyp ótti.
– Táýelsizdik alǵaly «Altaı – túrki áleminiń altyn besigi» atty halyqaralyq konferensııa tuńǵysh ret ótip otyr. Munyń aldynda Tatarstan, Bashqurtstan, basqa da birqatar memleketterde osyndaı mańyzdy sharalar bolǵany belgili. Birinshi kezeńde shetelderden kelgen on fotojýrnalıst Altaıdy aralap, týrızmdi damytý, kóne qorǵandar men obalar, tarıhı jerlerdi sýretke túsirip, sońynan О́skemende fotokórme uıymdastyrady. 26 tamyzda ortalyq Mádenıet úıinde halyqaralyq konferensııa óz jumysyn bastaıdy. Oǵan AQSh, Japonııa, Ońtústik Koreıa, Qyrǵyzstan, Reseıdegi túrki tildes memleketterdiń ǵalymdary men tarıhshylary qatysyp, pikir almasady. Shyǵys Qazaqstan oblysynyń ákimi Berdibek Saparbaev pen shetelderden kelgen resmı ókilder týrızmdi damytý, Altaıdyń ǵalamat tabıǵatyn zertteý jónindegi memorandýmǵa qol qoımaq. Al úshinshi kezeńde ór Altaıdyń tórindegi Berelde 12 memleketten kelgen ánshiler óz ónerlerin ortaǵa salady. Bul jerge 12 kıiz úı tigilip, qazaqtyń ulttyq sport oıyndary qonaqtar nazaryna usynylady. Sondaı-aq, halqymyzdyń tusaýkeser, súndetke otyrǵyzý, toqym qaǵý, basqa da ulttyq dástúrinen kórinister kópshilikti qyzyqtyrmaq. Sol kúni Berelde bal jáne qymyz jármeńkesi ótedi, – dedi Jaqsylyq Omar.
Ońdasyn ELÝBAI,
Shyǵys Qazaqstan oblysy.