Múmkindigi shekteýli balalar kórmesi

Jaqynda elordadaǵy Prezıdenttik mádenıet ortalyǵynda múmkindigi shekteýli jas talant­tar­dyń «Meniń álemim» atty sýret kórmesi ashyldy. Oǵan qoldaý kór­setken «Bıik Samǵaý» qoǵamdyq qory, Mádenıet mınıstrligi jáne Prezıdenttik mádenıet ortalyǵy. Múmkindigi shekteýli balalar – ómirdiń qatal synaǵyna ushyraǵan jandar. Sondyqtan olar qoǵamnyń ózderine degen aıryqsha nazaryna qashanda zárý. Ony túsinip túısiný árqaısymyzdyń boryshymyz bolsa kerek. Iá, bizdiń memleketimizde mundaı balalarǵa jan-jaqty qol­daý kórsetý isi jaqsy jolǵa qo­ıyl­ǵan. Osy oraıda Elbasy­myz­dyń: «Olardyń bolashaq qamyn oı­lap, jumyla járdem berý – barshamyzdyń paryzymyz», – degen sózi oıǵa oralady. Múmkindigi shekteýli balalar álem­di, qorshaǵan or­ta­ny ózderinshe túsi­nip, biz kóńil bóle bermeıtin eleýsiz oqı­ǵala­r­dan, qubylys­tar­dan bir erekshelik baıqap, janyna túıip júredi. Bul – olardyń jan-dú­nıesiniń árkez sergek júretinin bildirse kerek. Jas talant sýretshilerdiń ishki jan-dúnıesi men júrek bulqy­nys­taryn ózderi salǵan dúnıelerden zer sala qarasań, aıqyn ańǵarýǵa bolady. Tamyrshydaı tap basyp oı ıirimin aq qaǵazǵa túsirgende, kóz aldyna alýan túrli quby­lys­tardy ákeledi. Osy arqyly olar­dy mem­lekettiń tolyqqandy azama­ty retinde tanýǵa bolady. Tipti óz­derin bir álem desek jarasatyn­daı. Bul kórmege balalardyń 25 týyndysy qoıylǵan eken. Jaǵalaı qarap shyqqanda myna jalǵannyń búkil bolmysy osy sýretterge sy­ıyp ketkendeı áser alasyń. Ási­rese Bolys Janarys, Bıbigúl Nur­maǵambet, Vıktor Rampel, Aleksandra Mazýrenko, Dalııa Sýrova, Vıktor Kıl, Elızaveta Danılova, Lázzat Sultanova, Arlan Amangeldınov, Anjelıka Shapedko syndy avtorlardyń ju­mys­tary kóz jaýyn alady. Kórmeniń ashylýyna tıisti laýazym ıeleri, elshilik ókilderi, sheteldik qonaqtar qatysyp, jas qylqalam sheberleriniń táı-táı basqan tyń týyndylaryna tánti bolǵandaryn, olardyń bolashaǵy­nan zor úmit kútý qajettigin eske salyp, uıymdastyrýshylardyń aza­mattyǵyna alǵystaryn bildirdi. Bul kórme osy aıdyń sońyna deıin jurtshylyqqa usynylatynyn aıta ketsek deımiz. Súleımen MÁMET.