«Qalyptasqan ıgi dástúr boıynsha memlekettik nagradalar sizderge Otan qorǵaýshy kúni men Jeńis kúniniń qarsańynda tapsyrylyp otyr. Bul merekeler bizge aıryqsha qymbat. Ekinshi dúnıejúzilik soǵys tarıhy aǵa býynnyń eren erligi men asqan batyrlyǵynyń úlgisine aınaldy. Muny árqashan este ustaýǵa tıispiz. Eldiń tynyshtyǵyn, Otanymyzdyń shekarasyn qorǵaý, sol úshin qyzmet etý – barshańyzdyń paryzyńyz. Bereke men birligimizdiń arqasynda aspanymyz ashyq bolyp, elimiz órkendep, ósip kele jatyr», – dedi Qazaqstan Prezıdenti. Budan keıin Memleket basshysy quqyq qorǵaý qurylymdary men armııanyń el qaýipsizdigin jáne táýelsizdigin qamtamasyz etýdegi aıryqsha róline toqtalyp, olardyń adal qyzmeti men kásibıligi joǵary baǵalanýǵa, zor qurmetke laıyq ekenin atap ótti. «Sizder Otanǵa qaltqysyz qyzmet etýdiń jarqyn úlgisin kórsetip kelesizder. Áskerı, azamattyq paryzdaryńyzdy abyroımen atqaryp júrsizder. El súısingen erlikterińiz, týǵan jerge degen aınymas adaldyqtaryńyz ben erlik isterińiz – óskeleń urpaq úshin óshpes ónege. Jastar sizderge qarap boı túzeıdi, ósedi. Joǵary memlekettik marapatqa ıe bolý sizder úshin úlken maqtanysh jáne úlken jaýapkershilik. Elimizdiń áskerı qyzmetshisi jáne quqyq qorǵaý qurylymynyń qyzmetkeri ataǵyn aldaǵy ýaqytta da abyroımen alyp júretinderińizge senimdimin. Erlikterińiz elge úlgi bola bersin. Biz sizderdiń qıyndyqqa toly qyzmettegi, halyq ıgiligi jolyndaǵy eren eńbekterińizdi joǵary baǵalaımyz», – dedi Nursultan Nazarbaev. Sonymen qatar, Prezıdent Qazaqstanda áskerı qyzmetshilerdiń jalaqysy 1 shildeden bastap 25 paıyzǵa artatynyn aıtty. «Táýelsizdigimizdiń 25 jyldyǵynyń jáne Qarýly Kúshterdiń 25 jyldyǵynyń qurmetine oraı men Qorǵanys mınıstrliginiń, Ulttyq qaýipsizdik qyzmetiniń, Ulttyq gvardııanyń jáne Memlekettik kúzet qyzmetiniń áskerı qyzmetshileriniń laýazymdyq jalaqylaryn birinshi shildeden bastap 25 paıyzǵa kóterý týraly sheshim qabyldadym. Kez kelgen Táýelsiz memlekettiń Qarýly Kúshiniń, quqyq qorǵaý organdarynyń bolýy qajet ekendigin bilemiz. Sondyqtan, memleket qıyndyqtarǵa qaramastan, áskerı qyzmetshilerdiń materıaldyq-tehnıkalyq bazasyn kúsheıtý, jaǵdaılaryn jasaý úshin barlyq sharany qabyldap otyrady», – dedi bul jóninde Elbasy. Sóziniń sońynda Nursultan Nazarbaev marapattalýshylarǵa minsiz qyzmeti úshin alǵysyn bildirip, olarǵa zor densaýlyq, baq-bereke, jańa tabys tiledi. «Men búgin osy nagradalardy sizderge zor yqylaspen tapsyramyn. Bul – eńbekterińizdiń, minsiz qyzmetterińizdiń baǵalanýynyń nátıjesi. Áskerı qyzmetshiler, quqyq qorǵaý júıesi – memleketimiz ben táýelsizdigimizdiń tiregi. Sizder nagradany eleýli kezeńde – elimiz Qarýly Kúshteriniń 25 jyldyǵynda alyp otyrsyzdar», – dedi Qazaqstan Prezıdenti. Bul kúngi saltanatty shara barysynda I dárejeli «Dańq» ordenimen Soltústik Qazaqstan oblysynyń prokýrory Berik Asylov, Memlekettik kúzet qyzmeti bastyǵynyń orynbasary – Nysandardy qorǵaý qyzmetiniń bastyǵy Muhtar Aıýbaev, Ulttyq ulannyń bas qolbasshysy Rýslan Jaqsylyqov, Qorǵanys mınıstrligi Bas ınspeksııasynyń bastyǵy Qurban Qarajanov, Qorǵanys mınıstriniń birinshi orynbasary – Qarýly Kúshter Bas shtabynyń bastyǵy Murat Maıkeev marapattaldy. Al II dárejeli «Dańq» ordeni Ishki ister mınıstrligi Ákimshilik polısııa komıtetiniń tóraǵasy Igor Lepehaǵa jáne Qorǵanys mınıstrligi «Batys» óńirlik qolbasshylyǵy áskeriniń qolbasshysy Dáýlet Ospanovqa tapsyrylsa, I dárejeli «Aıbyn» ordenimen Ulttyq qaýipsizdik komıteti departament bastyǵynyń birinshi orynbasary Denıs Bartenov marapattaldy. Sonymen qatar, II dárejeli «Aıbyn» ordeni Ulttyq qaýipsizdik komıteti Astana qalalyq departamenti basqarma bastyǵynyń orynbasary Iskendir Áýesbaevqa, Ulttyq qaýipsizdik komıteti Batys Qazaqstan oblystyq departamentiniń basqarma bastyǵy Temir Ǵızzatovqa, Memlekettik kúzet qyzmeti departament bastyǵynyń orynbasary Evgenıı Lavrenıýkke, Qorǵanys mınıstrligi №30212 áskerı bóliminiń komandıri Talǵat Saparbaevqa, Qorǵanys mınıstrligi «Shyǵys» óńirlik qolbasshylyǵy áskeri qolbasshysynyń birinshi orynbasary Talǵat Ismaılovqa tapsyryldy. III dárejeli «Aıbyn» ordenimen Memlekettik kúzet qyzmetiniń Nysandardy qorǵaý qyzmeti 0112 áskerı bóliminiń saltanatty rásim batalony bólimshesiniń komandıri Narıman Ahmetýllın, Qorǵanys mınıstrligi Kadet korpýsynyń serjanty Mırbek Rahymbekov marapattaldy. «Erligi úshin» medali Ishki ister mınıstrligi Aqmola oblystyq ishki ister departamentiniń aǵa jedel ýákili Berik Aıtelenovke, Ishki ister mınıstrligi Aqtóbe oblysy boıynsha qylmystyq-atqarý júıesi KA-168/3 mekemesi jedel bólimshesiniń bastyǵy Nurjan Jıdehanovqa, Ishki ister mınıstrligi Astana qalasy tótenshe jaǵdaılar departamentiniń №8 órt sóndirý bóliminiń aǵa órt sóndirýshisi Ashat Sálkeevke, Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl ulttyq bıýrosy departamenti basshysynyń orynbasary Jasulan Tájibaevqa tapsyryldy. Sondaı-aq, «Jaýyngerlik erligi úshin» medalimen Ulttyq qaýipsizdik komıteti Úkimettik baılanys qyzmeti basqarmasynyń bastyǵy Ábjapar Ázimbaev, Qorǵanys mınıstrligi №41433 áskerı bóliminiń komandıri Serik Elýbaev, Qorǵanys mınıstrligine qarasty Armııa ortalyq sport klýby – Sport komıtetiniń nusqaýshy-serjanty Alına Raıkova, Qorǵanys mınıstrligi №55652 áskerı bóliminiń avıasııalyq eskadrılıa komandıriniń orynbasary Nurjan Tergeýbaev, Qorǵanys mınıstrligi №32363 áskerı bóliminiń desantty-shabýyl batalonynyń komandıri Almas Tólegenov marapattaldy. Al «Eren eńbegi úshin» medaline Qorǵanys mınıstrligi Bas áskerı klınıkalyq gospıtali bastyǵynyń orynbasary – medısına bóliminiń bastyǵy Gúlparıda Baıdildaeva ıe boldy. Saltanatty shara aıasynda memlekettik nagradany ıelengen azamattar da sóz sóılep, ózderiniń ystyq yqylas-nıetterin bildirdi. Máselen, Ulttyq ulannyń bas qolbasshysy Rýslan Jaqsylyqov: «Bul orden – maǵan degen úlken senim men qurmet. Ulttyq ulan sarbazdary Qazaq elin, Konstıtýsııasyn jáne Prezıdentin qorǵaýǵa árqashan daıyn», – dese, Qorǵanys mınıstrligi Bas ınspeksııasynyń bastyǵy Qurban Qarajanov Elbasyna degen júrekjardy lebizin bylaısha bildirdi: «Máńgilik Elimizdi, ultymyzdyń birligin kózdiń qarashyǵyndaı saqtaý – Otan qorǵaýshylardyń paryzy. Osy jolda Sizdiń senimińizdi aqtaı bilý – biz úshin qasıetti borysh». Qorǵanys mınıstriniń birinshi orynbasary – Qarýly Kúshter Bas shtabynyń bastyǵy Murat Maıkeev Elbasy qolynan joǵary marapatty alý ózi úshin úlken abyroı ekenin jetkizdi. «Qazirgi tańda bizdiń óz elimizdiń joǵary áskerı mektebiniń negizi qalandy. Áskerı, qorǵanys ónerkásibi quryldy. Munyń bári – Sizdiń batyl sheshimderińizdiń nátıjesi. Búginde Sizdiń qamqorlyǵyńyzben, durys júrgizilgen áskerı saıasatyńyzben Qarýly Kúshterimiz nyǵaıyp, damyp keledi. Osy oraıda, Sizge Qarýly Kúshterimizdiń atynan jáne jeke óz atymnan úlken alǵys bildiremin», – dedi ol óz sózinde. Joǵary nagradaǵa ıe bolǵan Ulttyq qaýipsizdik komıteti departamenti bastyǵynyń birinshi orynbasary Denıs Bartenov qazirgi tańda qaýipsizdik salasynda eńbek etip júrgen qyzmetkerlerdiń, ofıserlerdiń aldyna naqty mindetter qoıylyp otyrǵanyn, olar bul mindetti odan ári abyroımen atqarýǵa árdaıym daıyn ekendikterin aıtty. Al Qorǵanys mınıstrligi Kadet korpýsynyń serjanty Mırbek Rahymbekov: «Men – Sizdiń kóregen saıasatyńyzben ashylǵan Kadet korpýsynyń túlegimin. Alǵashqy áskerı antymdy qabyldaǵan sátten bastap, Otanyma adal qyzmet etip kelemin», – deı kele, búginde kásipqoı serjanttar el úshin adal qyzmet ete beretinin atap kórsetti.
Láıla EDILQYZY, «Egemen Qazaqstan»