Syr elinde týylǵan óren áskerı saladaǵy qadamyn 2001 jyly Shymkent qalasyndaǵy respýblıkalyq áskerı mektep-ınternatta oqýdan bastaıdy. Eki jyldan soń Túrkııadaǵy áskerı-teńiz ýchılıshesine qabyldanyp, onyń qabyrǵasynan bes jyldan soń «Keme qurylysy ınjeneri» mamandyǵyn alyp shyǵady. Arman qýalaǵan jas odan ári Túrik elindegi oqý oryndary men kemelerde biliktilik kóterý maqsatynda kýrstardan ótedi. Elge oralǵan áskerı maman «О́jet» shaǵyn kúzet kemesine elektrmehanıkalyq-jaýyngerlik bólimge komandır bolyp taǵaıyndalady da, artynsha 21814 áskerı bólimi komandıriniń elektr mehanıka bólimi boıynsha orynbasary bolyp qyzmetke kirisedi. Jumysqa jaýapty jas kóp uzamaı elektr mehanıkalyq qyzmettiń aǵa ofıseri retinde kemelerge qyzmet kórsetý, qurý jáne jobalaý-jasaqtaý jumystarymen aınalysady. – Qyzmet meni qyzyqtyra túskenin uqtym da odan ári bilim alyp, biligimdi tereńdete túsý kerek dep sheshtim. Osy oımen Túrkııadaǵy Áskerı-teńiz kúshteri akademııasyna áskerdi ákimshilik basqarý mamandyǵy boıynsha oqýǵa tústim. Sodan keıin sýda izdestirý jáne izdeý-qutqarý qyzmetiniń bastyǵy bolyp taǵaıyndaldym. Áskerde qyzmet etý árbir er adamnyń paryzy dep bilemin. Ras, 90-shy jyldardaǵy daǵdarys kelmeske ketip, qazir áskerı sala qaıta óz bıigine kóterildi dep oılaımyn. Onyń sebebi, elimiz daǵdarystan shyqty, áskerılerge jaqsy jaǵdaı jasaldy, salamyz aıaǵynan turdy. Endi Otanymyzdy damytý, qorǵaý – bizdiń mindetimiz, – deıdi S.Dastan. Qaı qyzmette de ózin uıymdastyrý qabiletiniń joǵarylyǵymen tanyta bilgen Samat qazir 29011 áskerı bólimi oqý ortalyǵynyń bastyǵy. Oqý orny – elimizdegi Qazaqstan Respýblıkasy Qaýrly Kúshteri Áskerı-teńiz kúshteri quramyna kishi basshylyq quram jáne teńiz mamandaryn daıyndaýmen aınalysatyn birden-bir oqý orny. Alǵashynda ortalyq ásker qatarynda ártúrli jaǵdaılarmen qyzmet ete almaǵan 27 men 32 jas aralyǵyndaǵy jigitterdi qabyldap, olardy Qarýly Kúshterdiń tank jáne motoatqyshtar bólimshelerine daıyndaýmen shuǵyldandy. Olar áskerı alańdarda bolyp, qarýmen jumys jasap úırendi, áskerı tehnıkalarmen tanysty jáne urys kezinde ártúrli jaǵdaılarǵa daıyn bolý joldaryn úırendi. Úsh jyl ishinde oqý ortalyǵynda Mańǵystaý, Atyraý, Aqtóbe, Batys Qazaqstan óńirlerinen kelgen 700 jigit atqysh, pýlemetshi, granata laqtyrý salalary boıynsha oqyp shyqty. Kelisimshart boıynsha jumys isteýshiler kishi keme qyzmetkeri mamandyǵy boıynsha daıyndyqtan ótedi jáne qyzmetke taǵaıyndalady. Bul turǵyda ortalyq elimizdiń Qarýly Kúshteri quramyn kóbeıtý jáne jastardy jumyspen qamtý sııaqty eki birdeı baǵytty qatar júzege asyryp keledi. Otbasynda eki bala tárbıelep otyrǵan Samat Almatulynyń bolashaqqa senimi mol. Qazaq, orys tilderimen birge túrik jáne aǵylshyn tilderin meńgergen ol álem elderimen tájirıbe almasa alý úshin birneshe til bilgendi jón sanaıdy. Samat sóz sońynda qazaq jastarynyń elimizdi qorǵaý úshin bilimdi, shynyqqan shymyr bolýy qajettigin mańyzdy dep biletindigin jetkizdi.
Gúlaıym ShYNTEMIRQYZY, «Egemen Qazaqstan» Mańǵystaý oblysy