Hat-habarlar eshelondarmen, súńgýir qaıyqtarmen de jiberiletin. Al poshtashylar oq pen ottyń arasynan 30-40 kılo qaptardy arqalap ótýge tyrysatyn. Qysqasy, hat-habar qalaıda ıesine jetkizilmeı qoımaıtyn. Soǵys jáne eńbek ardageri Ǵ.M.TOQTABAEV búginde 93 jasta. Biz Jeńis kúni qarsańynda qart maıdangerge jolyǵyp, az-kem áńgimelesken edik. – Ǵızat Muhtaruly, maıdanda aıtarlyqtaı aýyr jaralansańyz da, soǵysty jalǵastyra beripsiz. Osy týraly aıtyp berińizshi? – Ýkraınada soǵystym. 1944 jyldyń 12 shildesinde búkil rotamen shabýylǵa shyqtyq. Bul joly artıllerııalyq daıyndyq degen bolǵan joq, óıtkeni, turǵan jerimiz nemisterge tym jaqyn edi. Urys birneshe kúnge sozyldy, biz kóptegen joldastarymyzdan aıyryldyq. Okoptarda jatamyz, kúsh sarqylǵan, biraq sheginýge bolmaıdy, tura salyp, «Ýra!!!» dep alǵa umtylamyz. Sol sátte mergenniń oǵy maǵan dóp tıip, jaraqat aldym. Jap-jas sanıtar qyz meni urystan alyp shyǵyp, dala gospıtaline jetkizdi. Oq basymnan tıip, ishinde qalyp ketken. Odan tek 1958 jyly ǵana aryldym. Oqtyń uzyndyǵy 3,5 sm, salmaǵy 11 gramm eken. Sol oq qazir Aqtóbe mýzeıinde tur. Qysqasy, 20 kún gospıtalde jatyp, maıdanǵa qaıta oraldym. Sodan keıin de eki ret jaralandym. – Úıden hat jıi kelýshi me edi? – Hat deımisiń... hat soldat úshin mańyzdy oqıǵa bolatyn. Biz poshtashyny týǵan baýyrymyzdaı kútip, qarsy alýshy edik. Soǵys ýaqytynda polktiń bir ornynda tura bermeıtini belgili, sondyqtan, hat-habar ýaqtyly jetkizilmeıtin kezder de bolyp turatyn. Al poshta kelgen kez biz úshin úlken meıram edi. – Soǵystan keıingi ómirińiz týraly málimet bere ketseńiz. – Soǵystan keıingi ýaqyt týraly aıtsam, 1949 jyldyń qańtarynda men Aqtóbe oblystyq telegraf aýysymynyń bastyǵy retinde jumysqa shyqtym. Sodan keıin Almaty baılanys elektr tehnıkýmyn bitirip, zeınetker atanǵan 1985 jylǵa deıin úzilissiz jumys istedim. Bul saladaǵy jalpy jumys ótilim – 36 jyl. Osy jyldardyń bárinde men poshta baılanysy bólimshelerinde túrli laýazymdarda qyzmetter atqardym. – Áńgimeńizge rahmet. Densaýlyǵyńyz myqty bolsyn, aýyrmańyz.
Áńgimelesken Temir QUSAIYN, «Egemen Qazaqstan»
AQTО́BE