«Qazirgi tańda oblysymyzda 2 myń gektarǵa jýyq qarqyndy baý bar. Olarǵa qajetti qural-jabdyqtar shetelden tasymaldanatyn. Endigi maqsat – baý-baqshaǵa qajetti beton baǵanalary men tor, plastıkalyq qurylǵylardy ózimizde óndirýge múmkindik týyp otyr. Bul óz kezeginde almanyń ózindik quny arzandaı túsedi. Sondaı-aq, baǵbandyqty jetik meńgergen maman daıarlaý isine de mán berilýi tıis. Jalpy, oblysymyzdaǵy ıntensıvti baýlardyń kólemin taǵy da 1000 gektarǵa ulǵaıtý josparymyzda bar», dedi Janseıit Qanseıituly.
«Birlik» AО́K» óndiristik kooperatıviniń sýarmaly jer kólemi 86 gektardy quraıdy. Sonyń búginde 70 gektarynda 200 myń túp alma kóshetteri otyrǵyzylǵan. Italııalyq qural-jabdyqtarmen jaraqtandyrylǵan baý 3 jyldan soń ár gektaryna 50-60 tonnadaı ónim berýge qaýqarly. Munda qazir almanyń Golden Delıshes, Red Delıshes, Gala, Fýdjı, Grenı, Smıt sekildi túrleri túıindep tur. Qarqyndy baýdyń jalpy ınvestısııalyq quny – 1 mlrd 200 mln teńgeni qurady. Jobaǵa quıylǵan qarjynyń 1 mlrd teńgesin «Aýyl sharýashylyǵyn qarjylaı qoldaý qory» AQ berse, 200 mln teńgesi – jeke qarjy.
«Qazir munda 18 adam turaqty jumyspen qamtylsa, maýsym kezeńderinde 100 adamdy eńbekpen qamtımyz dep otyrmyz. Baýymyz ónim berý qarqynyn 3 jyldan keıin alady. Sol kezde ónim kólemi gektaryna 50-60 tonnaǵa deıin jetedi. Al bıyl gektaryna 5-6 tonnadan ónim alamyz degen josparymyz bar», deıdi «Birlik» AО́K» óndiristik kooperatıviniń atqarýshy dırektory Bekjan Qalıbekov.
Qazyǵurt aýdanyndaǵy qarqyndy baýdyń montajdaý jumystaryn óńirimizge belgili «Zıramaks» kompanııasy ornatqan. Atalmysh kooperatıv maman daıarlaý isine de mán berip, agronomdardy Italııada arnaıy oqytypty. Aldaǵy ýaqytta kooperatıv basshylyǵy qarqyndy baý egemin degen ońtústikqazaqstandyq sharýalarǵa aqyl-keńes berip, tájirıbelerimen bólispek. Bul óz kezeginde oblysymyzdaǵy qarqyndy baýlardyń sanyn kóbeıtip, óńirimizdegi alma ımportyn azaıtyp, eksportty ulǵaıta túsetin bolady.