Otyrys barysynda Prezıdent N.Nazarbaevtyń maqalasyndaǵy negizgi aspektiler ortaǵa salynyp, talqylandy. Sonymen qatar, Qazaqstan halqy Assambleıasynyń 25-sessııasynda belgilengen mindetter týraly Keńes músheleri ózderiniń oılaryn ortaǵa saldy. Negizgi baıandamanyń birin Qazaqstan halqy Assambleıasy Tóraǵasynyń burynǵy orynbasary, L.N.Gýmılev atyndaǵy Eýrazııa ulttyq ýnıversıtetiniń professory Anatolıı Bashmakov jasady. Ol Prezıdenttiń «Bolashaqqa baǵdar: rýhanı jańǵyrý» maqalasyndaǵy alǵa qoıylǵan mindetterdi iske asyrý jónindegi Ulttyq komıssııanyń múshesi ekenin eskerte kelip, alda turǵan jumystar jóninde aıtyp ótti. «Bizdi keshe ǵana Prezıdent Ákimshiligine jınap, jumys toptaryna bóldi. Men ózim patrıotızmdi damytýmen aınalysatyn jumys tobynyń qataryna endim. Týǵan jer baǵdarlamasy jalpyulttyq patrıotızmniń ózegine aınalý kerektigin Elbasy atap kórsetti. Týǵan jerge degen súıispenshilik týǵan elimiz Qazaqstanǵa degen patrıottyq sezimge ulasýy kerektigi de maqalada aıtylǵan. Meniń júregime de osy baǵyt jaqyn, sondyqtan men osy toptyń qataryna engenime qýandym. Kez kelgen ekonomıkalyq reforma nemese mekteptegi bilim, saıası júıegi jańǵyrtý adamnyń óziniń kózqarasyn ózgertýden bastalýy kerek. Sondyqtan, komıssııanyń bazalyq qurylymy bolatyn naq osy topta jumys isteıtinderge nasıhatpen aınalysqan bilikti mamandar toby qajettigin men otyrysta aıtyp, ózimniń usynysymdy jasadym. Biz aımaqtarǵa baryp sanany jańǵyrtýdyń qajettiligin halyqqa jetkizýimiz kerek», dedi ol.
О́ziniń sózinde Anatolıı Bashmakov sanany jańǵyrtý jumysynyń ońaı emestigin, «adamnyń sanasyn ózgertkennen atomnyń qupııasyn ashý áldeqaıda jeńil» degen sózdiń baryn aıta kelip, tek qana sheshen sóıleıtin, oı-órisi tereń, parasaty bıik ǵalymdar ǵana halyqtyń júregine jol taýyp, Prezıdenttiń alǵa qoıǵan mindetterin jetkize alatynyn aıtty.
Basqa da shyǵyp sóıleýshiler osy pikirlerdi jaqtap, óz oılaryn jetkizdi. Sonyń ishinde QHA Ǵylymı-sarapshylyq keńesiniń múshesi, fılosofııa ǵylymdarynyń doktory Grıgorıı Kosıachenko da bolyp, ol memlekettiń dinı jáne gýmanıstik qundylyqtaryn teńestirý qajettigine nazar aýdardy. Sonymen qatar, ol Prezıdenttiń maqalasyndaǵy «Qazaqstandaǵy 100 jańa esim» jobasyn oryndaý barysynda yńǵaısyz básekelestik bolmaý jaǵyn qarastyrý kerek ekenin atady. «Sondyqtan, jumys toby osynaý tizimge engiziletin adamdardyń krıterııin aldymen anyqtap alyp, ony qatań túrde iske asyrýy kerek», dedi G.Kosıachenko.
Al osy Keńestiń múshesi, fılosofııa ǵylymdarynyń doktory, professor Qazbek Qazkenov Prezıdenttiń bul maqalasy HHI ǵasyrdaǵy adamzattyq syn-qaterlerge qarsy qoldanylatyn ózekti másele ekenin atady. «Bizdiń elimiz bárine de qarsy turýǵa daıyn bolýy kerek. Tek ekonomıkalyq, saıası, quqyqtyq daıyndyqtar azdyq etedi, eń bastysy, árbir azamattyń ulttyq ustanymy berik, Otanynyń qaýipsizdigi men táýelsizdigi jolyndaǵy qadamdarǵa sanaly túrde daıyn bolýy kerek», dedi ol.
Fılologııa ǵylymdarynyń doktory Nursulý Sháımerdenova maqalanyń mádenı aspektilerine nazar aýdaryp, óziniń osy baǵyttaǵy oılaryn ortaǵa saldy. «Bizde bári de bar. Endigi mindet Elbasy atap kórsetkenindeı, tek ulttyq mádenı kodymyzdy, etnosaralyq kelisim men ózara túsinistikti saqtaý ǵana. Bizdiń jarqyn bolashaǵymyz osyǵan tikeleı baılanysty», dedi professor. Sonymen birge, ol kezdesýdiń tıimdi bolǵanyn da atap ótti.
Bulardan basqa da sóıleýshiler ózderiniń osy taqylettes oılarymen bólisti.
Jaqsybaı SAMRAT,
«Egemen Qazaqstan»