Munaı maıtalmany Bólekbaı Saǵynǵalıuly Saǵynǵalıevtiń (1927-2009 j.j.) ónegeli ómir joly keıingi jas býynǵa zor úlgi. Ardaqty azamat eńbek jolyn munaı óndirý sheberiniń kómekshisi bolyp bastady. О́ndiriste shyńdalyp, abyroıly eńbegimen bıik belesterdi baǵyndyrdy. «Qazaqstanmunaı» О́B (1945 j. «Embaneft» tresi «Qazaqstanmunaı» О́P bolyp ózgergen), Qazaqstan munaı birlestiginiń bólim basshysy, Halyq sharýashylyǵy keńesi munaı bóliminiń meńgerýshisi, Ortalyq partııa komıtetinde aýyr ónerkásipti qamtıtyn bólim basshysynyń munaı jónindegi orynbasary, «Qazaqstanneft» birlestigi bas dırektorynyń ekonomıkalyq máseleler jónindegi orynbasary, 1971-1986 j.j. «Embaneft» О́F bas dırektory qyzmetterin atqardy. Eńbek Qyzyl Tý, Oktıabr revolıýsııasy ordenderimen, merekelik medaldarmen jáne Qazaq KSR Joǵarǵy Keńesiniń birneshe ret Qurmet gramotasymen marapattalǵan. Sharaǵa munaıshy-ardagerler, Qazaqstan munaıgaz ónerkásibi salasynyń qyzmetkerleri, kompanııa basshylary, úzeńgiles jáne izbasar áriptesteri, ardaqty azamattyń otbasy músheleri, búgingi munaıshy mamandar, qala jurtshylyǵy qatysty. «Embimunaıgaz» AQ Basqarma tóraǵasy Ánýar Jaqsybekov saltanatty sharada Bólekbaı Saǵynǵalıulynyń ómir jolyna qysqasha toqtalyp, el munaıyn eseleýge qosqan úlesin, maıtalman munaıshyǵa qoıylǵan osynaý belgi búkil munaıshylar qaýymyna jasalǵan qurmet ekendigin atap ótti. Memorıaldyq taqtany «Embimunaıgaz» AQ basqarma tóraǵasy Á.Jaqsybekov pen B.Saǵynǵalıevtiń uly Asqar Saǵynǵalıev ashty. Taqtada «Osy úıde 1974-1986 jyldary Qazaqstannyń eńbek sińirgen munaıshysy, KSRO Qurmetti munaıshysy, Teńiz munaı kenishin alǵash ashýshy, Qazaqstan Respýblıkasy Memlekettik syılyǵynyń laýreaty Bólekbaı Saǵynǵalıuly Saǵynǵalıev turdy» dep jazylǵan. Bólekbaı Saǵynǵalıulynyń inisi Tańqybaı Saǵynǵalıev atalǵan belginiń aǵasyna ǵana emes, búkil qazaq munaıy men munaıshysyna kórsetilgen qurmet dep baǵalady. – Bólekbaı aǵanyń Embi munaıyn óndirý isine qosqan úlesi, onyń eńbegi men izgi bastamalary kezinde qoldaý taýyp, júzege asyryldy. Búgingi urpaq sonyń zeınetin kórip otyrǵandyǵy da shyndyq. Al onyń esimin ulyqtaý isin qolǵa alǵan izbasar áriptesteri men jergilikti atqarýshy organdardyń birlesken osynaý áreketi óte quptarlyq jumys ekendigi aıqyn. Bul ónegeli is boldy. Osyndaı jaqsy ister alda da jalǵasyn taba bersin, – dedi ol. Maıtalman munaıshymen eńbektes bolǵan áriptesteriniń biri munaıshy-geolog Maqash Rahmetov te óz lebizin bildirip: – Bólekbaı Saǵynǵalıuly – atyna zaty saı, ózindik bólek, dara joly bar munaı óndirý men damytý isine úlken eńbek sińirgen bilimdi azamat, bilikti basshy edi. Ol bir emes, birneshe isterdiń ıgilikti bastamashysy boldy. Onyń kóregendik jolymen tuz asty qabatyndaǵy munaıǵa tereń burǵylaý júrgizý jónindegi jumystary solardyń eń bir shyńy dese bolǵandaı. Odaq basshylarymen aıtysa-tartysa júrip, kózderin jetkizdi, jeńdi. Alyp Teńiz kenishin ashýshylardyń biri retinde onyń sińirgen eńbegi ushan-teńiz. Osyndaı tulǵalardyń ulyqtalýy óte oryndy is. Biz soǵan qýanyp turmyz. Osy istiń júzege asýyna muryndyq bolyp júrgen barlyq deńgeıdegi basshylarǵa alǵys bildiremiz, – dedi ardager aǵa. Taqta ashý rásiminen keıin «Embimunaıgaz» AQ keńsesinde «B.Saǵynǵalıevtiń Qazaqstan munaı-gaz salasynyń damýyna qosqan úlesi» atty ǵylymı-praktıkalyq konferensııa ótip, oǵan da ardager munaıshylar, B.Saǵynǵalıevtiń otbasy músheleri men birge qyzmettes bolǵan áriptesteri, munaıgaz salasynyń kóptegen mamandary qatysty. Konferensııany munaıshy-ǵalym, ınjener-geolog Baltabek Qýandyqov ashyp, júrgizip otyrdy. Alǵashqy sóz «Embimunaıgaz» AQ Basqarma tóraǵasy Ánýar Jaqsybekovke berilip, ol aǵalar salyp ketken sara jolmen júrip kele jatqan Embi óndirisiniń búgingi tynysyna toqtaldy. Konferensııa barysynda B.Saǵynǵalıevtiń ómir joldarynan syr shertetin «QazMunaıGaz» Barlaý О́ndirý» AQ demeýshiligimen ázirlengen «Alǵashqy ashýshy» derekti fılminen úzindi kórsetildi. Onda Bólekbaı Saǵynǵalıevtiń eńbek joly men atqarǵan isteri kóz kórgender áńgime-pikiri arqyly shynaıy berilgen. Fılmniń rejısseri – Qazaqstannyń eńbek sińirgen qaıratkeri, belgili rejısser Sergeı Ázimov. Atyraý oblysy ákiminiń birinshi orynbasary Ǵ.Dúısembaev oblys ákimi atynan munaıshy-ardagerdiń 90 jyldyǵymen quttyqtap, mundaı azamattardy ardaqtaý paryz ekendigin aıtty. Jıyn barysynda Energetıka mınıstriniń birinshi orynbasary M.Dosmuhambetov, «Qazenerdjı» Qaýymdastyǵynyń bas dırektory B.Aqsholaqov, áriptes inisi T.Baızaqov pen «Embimunaıgaz» AQ ardagerler keńesiniń tóraǵasy B.Smatýllın Bólekbaı Saǵynǵalıulynyń basshy retindegi jáne adamı qyrlaryn sýrettep, onyń eren isterin erekshe atap ótti. – Búgingi dańǵyl jolda damyp jatqan munaı ónerkásibi – keshegi ardager munaıshy aǵalarymyzdyń ashy mańdaı teri tógilip jetken eńbektiń jemisi. Bólekbaı Saǵynǵalıuly ómiri men eńbegin, barlyq qajyr-qaıratyn, bilimin munaı óndirisiniń damýyna, jańa ken oryndarynyń ashylýyna, ulttyq kadrlardyń qalyptasýyna arnady. Ol óz mamandyǵyn ǵana emes, Otanyn, týǵan elin erekshe súıgen patrıot retinde de tarıhta qalady, – dedi M.Dosmuhambetov. «QazMunaıGaz» BО́» AQ Bas dırektory Q.Esqazıev te atalǵan sharanyń jas urpaq úshin mańyzy zor ekendigin atap ótti. – Búgin barlyǵymyz úshin erekshe kún. Munaı tarıhynda máńgilik esimi jazylǵan Bólekbaı Saǵynǵalıuly Saǵynǵalıevtiń týǵanyna 90 jyl tolyp otyr. О́zi ortamyzda joq bolsa da sońynda jarqyn isin qaldyrǵan maıtalman munaıshynyń ómir jolyn dáripteý, urpaqqa úlgi etý – búgingi bizdiń paryzymyz! Qazirgi damyǵan óndiris, qanatyn keń jaıǵan kenishter – keshegi bizdiń osy aǵalarymyzdyń ashy mańdaı terimen jasaldy. Qazaqtyń birtýar, talantty uly elimizdiń munaı salasyndaǵy bolashaǵyn dál boljaı bildi jáne ony sonaý Keńes zamanynda Máskeýde tabandy qorǵady. Ǵasyr jobasy atanǵan Teńiz kenishiniń ashylýy – osynyń jarqyn dáleli! Munaıshylardyń áleýmettik jaǵdaıyn jasaý, ulttyq kadrlardy daıyndaý, eski Embi kenishterin túletý sııaqty sansyz jumystardyń barlyǵyn ol abyroıly atqardy. Bólekbaı Saǵynǵalıulynyń ǵıbratty ǵumyry – árbir munaıshyǵa úlken ónege bolýy tıis. Ardager aǵalarymyzdyń eńbek jolyn abyroıly jalǵastyrý – búgingi bizdiń mindetimiz, – degen ol maıtalman munaıshynyń keıingi izbasarlary onyń aıshyqty isterin laıyqty jalǵastyryp kele jatqandyǵyn atap ótti. Bólekbaı Saǵynǵalıulynyń Teńiz ken ornyn alǵash ashýshylardyń biri retinde bilip, tanyp kelgen «Teńizshevroıl» kompanııasy da aıtýly sharadan tys qalmady. Kompanııanyń Bas dırektory T.Etchıson sharaǵa úlken jańalyǵymen kelgen eken. – Bólekbaı Saǵynǵalıev Qazaqstannyń munaı jáne gaz ónerkásibin damytýǵa aıtarlyqtaı úlesin qosty. Onyń kóregen basshy retindegi rólin sózben aıtyp jetkize almaspyz. Teńiz ken ornynyń ashylýy Bólekbaı Saǵynǵalıevtiń esimimen tikeleı baılanysty. «Teńizshevroıl» óziniń zor qurmetin bildire otyryp, Teńiz jáne Korolev ken oryndarynyń júregi men jany bolyp tabylatyn Teńizdegi kenishti paıdalaný keńsesine onyń esimin berýdi úlken maqtanysh sanaıdy, – deı kele, TShO-nyń Alǵys haty men Bólekbaı Saǵynǵalıevtiń esimin berý jaıly sertıfıkatty «Embimunaıgaz» AQ basshysy Á.Jaqsybekovke tabystady. B.Saǵynǵalıevtiń uly Asqar Bólekbaıuly da minbege kóterilip, óz lebizin bildirdi. – Qurmetti konferensııaǵa qatysýshylar, munaıshylar! Ákemizdiń eńbegin baǵalap, esimin ulyqtap, aýqymdy shara uıymdastyrylǵany úshin sheksiz rızashylyǵymyzdy bildiremiz. Biz úshin ol úlken mereı, zor abyroı. Ákemiz búkil ǵumyryn munaı isine arnaǵan adam. Úıde bolǵanynan túzde júrgeni kóp azamat boldy. Eli úshin ter tógip, eńbek jasady. Mine, ýaqyt óte kele izgi bastamalar qolǵa alynyp, jarasty jumystar jasalýda. «Embimunaıgaz» búginde myqty kásiporynǵa aınaldy, bilikti mamandarymen maqtana da alatyndaı dárejede. Eńbekterińizge jemis tileımin, barshańyzǵa rahmet, – dedi ol tolǵana sóılep. Shara sońynda «QMG» BО́» AQ Bas dırektory Q.Esqazıev pen «EMG» AQ Basqarma tóraǵasy Á.Jaqsybekov B. Saǵynǵalıevtiń jary Hadısha apaı men otbasy múshelerine qazaqy dástúrmen shapan, qamzol jaýyp, syı-syıapattar tabys etti.
Qosuıym MUQAShEV