Qazaqstannyń qurmetti sáýletshisi Saıyn Nazarbekuly Kaspıı janyndaǵy eń úlken úńgirdi ǵımarat retinde qoldanýdy usynyp otyr. Abaı Qunanbaıuly men Domalaq ana kesenelerin qaıta jańǵyrtqan tanymal arhıtektor josparyna qala ákimdigi qoldaý bildirdi. Uzyndyǵy – 70, bıiktigi 2 metrlik úńgir ortasyna tastan kıiz úı pishindes ǵımarat salynyp, ishine qazaqtyń kóne jazýlary qashalyp túsirilmek. Memlekettik jáne aǵylshyn tilderinde jazylatyn derekterden erte zamanǵy Shýmer jazbalarynan bastap Kúltegin, Orhon-Enıseı, Tonykók jazýlarynyń, Ile boıy, Qarataý men Mańǵystaý jerindegi shar tárizdes tastarda beınelengen tańbalar tarıhyn kórýge bolady.
«Mádenıet sóıleýden bastalady, ekinshi – jazýdan. Sonda bizdiń sózimiz 5500 jyl buryn ómir súrgen shýmerlerdiń tilinde júrse, bizdiń jazýymyz sol zamannan beri jalǵasyp kele jatsa, qazaq halqynan uly halyq bar ma? Joq. Eń uly halyqtardyń birimiz. Sony jastardyń júregine sińirý kerek. Elbasy aıtyp otyr ǵoı «Máńgilik el bolamyz» dep. Máńgilik eldiń belgileri osy», dedi Qazaqstannyń Eńbek sińirgen qaıratkeri Saıyn Nazarbek.