Elektrondy densaýlyq pasporty 2018 jyldyń sońyna deıin engiziledi

Bul týraly Úkimet úıinde Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyn iske asyrýdyń bıylǵy 4 aıdaǵy aralyq qorytyndylaryna arnalǵan baspasóz konferensııasynda Densaýlyq saqtaý mınıstri Eljan Birtanov aıtyp berdi.  Atap aıtqanda, Densaýlyq saqtaý mınıstrligi elektrondy densaýlyq pasportyn ázirleý boıynsha jumys júrgizýde, ol turǵylyqty jáne emdelý ornyna táýelsiz kez-kelgen jerden qoljetimdilikti qamtamasyz ete otyryp, densaýlyq týraly mańyzdy málimetterdiń barlyǵyn ómir boıy saqtaýǵa múmkindik beredi.  «2018 jyldan bastap Qazaqstan Respýblıkasy aýmaǵynda elektrondy densaýlyq pasportyn kezeń-kezeńmen engizý josparlanǵan. Qazirgi ýaqytta Astana qalasynyń № 9 qalalyq emhanasy bazasynda shuǵyldanýshy dárigerlermen birge elektrondy densaýlyq pasportyn paıdalaný boıynsha pılot júrgizilýde», – dedi mınıstr.  Vedomstvo basshysy jýrnalısterdiń suraqtaryna jaýap berý barysynda barlyq qaǵaz máseleleri 2019 jylǵy 1 qańtardan bastap joıylatynyn málimdedi.  Eljan Birtanov búginde orta eseppen alǵanda Qazaqstan Respýblıkasynda densaýlyq saqtaý uıymdarynyń 38%-ynda jergilikti medısınalyq aqparattyq júıeler engizilgenin aıtyp ótti.  «Densaýlyq saqtaý uıymdaryn kompıýterlik tehnıkamen qamtamasyz etip, jergilikti medısınalyq aqparattyq júıelerdi engizý úshin oblystar men Astana jáne Almaty ákimdikterimen birlesip, tıisti IT-ınfraqurylymdy qurý sharalary qabyldanýda. Mınıstrlik pen óńir ákimderi arasynda densaýlyq saqtaý uıymdaryn 2017 jyly 50%-ǵa deıin jáne 2018 jyly 100% qajetti kompıýterlik tehnıkamen qamtamasyz etý jóninde memorandýmdarǵa qol qoıyldy. Bıyl jergilikti bıýdjet qarajaty esebinen 16 myńnan astam kompıýter tehnıkasyn satyp alý josparlanǵan», – dedi spıker.