Jańa kásiporyn qazaqstandyq munaı hımııasy ónimderin shyǵarmaq. Bul ónimder munaı-gaz sektorynda qyzmet etýshi kompanııalardyń qajetin óteıtin bolady.
Jańa kompanııa basshylyǵymen kezdesýde Batys Qazaqstan oblysynyń ákimi Altaı Kólginov 2017-2018 jyldary salynýy tıis óndiristik qurylys nysandarynyń josparymen tanysty. Jańa kásiporynǵa ınvestısııa tartý, alǵashqy kezeńde bilikti mamandardy shetelden aldyrýdyń zańdylyqtary pysyqtaldy. Áriptestik baılanystyń ózge de qyrlary talqyǵa tústi.
Qazaqstandyq, ırandyq men kanadalyq kásipkerler tarapynan birikken kásiporyndy qurýǵa qajetti barlyq qujattarǵa qol qoıylyp, qurylys nysandarynyń jumysy bastalyp ta ketti.
«QazChem» kompanııasynyń basqarýshy dırektory Alıreza Saıed Hoseınıdiń aıtýynsha, jańa kásiporynda eń zamanaýı qondyrǵylar ornatylyp, qorshaǵan ortaǵa zalalsyz, ekologııalyq lastaýsyz jumys isteıtin bolady.
Jaqyn kúnderi kompanııanyń óndiris alańynda munaı reagentterin sıntezdep, tasymaldaýǵa daıyndaıtyn seh salynbaq.
Qazirdiń ózinde sý men munaı negizindegi tehnologııalyq eritindilerdi shyǵaratyn blendıng sehynyń ınjınırıngi tolyq ázir. Rezervýar parki, saqtaýshy qoımalar jáne hımııalyq zerthana jobasy daıyn.
Kompanııanyń Damý boıynsha dırektory Ǵaısa Jumalıevtiń aıtýynsha, jańa zaýyt taıaý arada munaı-gaz kompanııalaryn Qazaqstanda óndirilgen joǵary sapaly hımııa ónimderimen qamtamasyz etetin bolady. Batys Qazaqstan oblysynyń geografııalyq jaǵynan yńǵaıly ornalasýy ónimdi tasymaldaý shyǵynyn edáýir azaıtady. Kompanııa taıaý bolashaqta EAEO elderiniń naryǵyna ónim shyǵarýdy da josparlap otyr.
Qazbek Quttymuratuly,
«Egemen Qazaqstan»
Oral
Sýretti túsirgen avtor