Aqtóbedegi qoqys suryptaý kesheniniń qurylysy ótken jyly bastalǵan bolatyn. Búgin qaladan shyǵarylǵan qatty turmystyq qaldyqtyń 40 paıyzyn suryptyp, qaǵaz, plastıkalyq zattar men shynylardy, metaldy tórt bólek jınap, qaıta óńdeýge jiberýge múmkindik beretin keshen iske qosyldy. Keshendi oblys ákimi Berdibek Saparbaev ashyp, jańa kásiporynnyń jumysymen tanysty. Munda 100-den astam adam jumys isteıdi. Eki aýysymda eńbek etetin adamdar arnaıy qurylǵylardyń kómegimen qoqysty suryptaıdy.
Joba jetekshisi Altynbek Qazantaevtyń aıtýynsha, keshen qurylysy men arnaıy qurylǵylardy satyp alýǵa 1 mıllıon dollar jumsalǵan. «Bir ret paıdalanylatyn paketter, plastıkalyq bótelkeler uzaq jyldar boıy shirimeıdi, zııany kóp. Al jańa keshen arqyly qaladan shyǵarylǵan barlyq plastıkalyq zattardy jınap, ony káriz shuńqyrlaryna arnalǵan qaqpaq jasaıtyn sehtarǵa shıkizat retinde ótkizemiz. Kásiporynda jylyna 200 myń tonna qoqys óńdeledi. Suryptalǵan qaǵaz, metall, áınek zattar da satylady»,- dedi Altynbek Qazantaev.
Bir aıta keterligi, Aqtóbe qalasyndaǵy qoqys polıgonynyń aýmaǵy 62 gektarǵa jetti. Munda kúnine 500 tonna qoqys jetkiziledi. Buǵan deıin Aqtóbede qatty turmystyq qaldyq suryptalyp, óńdelgen emes. Oblystyń ekologııalyq jaǵdaıyn jaqsartý josparyna sáıkes Aqtóbe qalasynyń ákimdigi, «Aqtóbe» áleýmettik-kásipkerlik korporasııasy» AQ men «Soıýz Grand» JShS-i kelisip, keshen saldy. Keshenge qoqys polıgony aýmaǵynan 1 gektarǵa jýyq jer bólindi.