«Altyn belgi» ıegeri tómen ball alsa, mektep dırektory jaýap beredi – BǴM

Bıylǵy jyldan bastap «Altyn belgini» berý quqyǵy mektepterge berilgeni belgili.  Maırash Taıkenovanyń aıtýynsha, mınıstrlik «Altyn belgi» ıegerleriniń sanyna, olardyń joǵary oqý oryndaryndaǵy úlgerimderine taldaý júrgizetin bolady. Sondaı-aq mekteptegi jýrnaldan 11 jyl ishinde alǵan baǵalaryn da qaraıdy.  «Endi mektepter «Altyn belgini» attestattaý qorytyndysy boıynsha beredi. Bilim jáne ǵylym mınıstrligi mektepterge úlken senim artyp otyr. «Altyn belgini» berý kezinde sybaılas jemqorlyqty boldyrmaý úshin vıse-mınıstr, departament basshylary mektep dırektorlarymen kezdesip, áńgimelesýde. Bilim jáne ǵylym mınıstrligi tarapynan mindetti túrde baqylaý júrgiziletini aıtylyp jatyr. «Altyn belgi» ıegeri tómen ball alyp, joǵary oqý ornyna túse almaı qalsa, oǵan mektep dırektory jaýapty bolady, – dedi mınıstrdiń keńesshisi Tengrinews agenttigine bergen suhbatynda. – Biz ashyqtyqty qamtamasyz etý úshin elektrondyq formatqa aýysýdy kózdep otyrmyz. Oqýshynyń aty-jónin jazyp, onyń 11 jyl boıy qandaı baǵa alǵanyn kóre alamyz. Elektrondy kúndelik engizilgen soń, kez-kelgen oqýshynyń ómirbaıanymen tanysýǵa múmkindik bolady».  Sonymen qatar, mınıstrlik ókili bıyl joǵary oqý oryndaryna tapsyrý kezinde 2017 jylǵy olımpıada jeńimpazdary úshin basymdyq bolmaıtynyn atap ótti.  «Bul JOO-ǵa túsýde barlyǵynyń quqyqtaryn teńestirý úshin jasalyp jatyr. Endi eń bastysy – bilim. Oqýshylar Ulttyq birińǵaı testileýdi tapsyrýyna baılanysty tıisti balldaryn alady», – dedi M.Taıkenova.  Ol sondaı-aq osy jyly UBT tapsyrý ýaqyty uzartylǵanyn, suraqtar kóbeıgenin jetkizdi. Buryn úsh saǵat bolsa, endi úsh saǵat otyz mınýt. Burynǵy 120 suraqtyń ornyna, endi 140 suraq bolady.  Mınıstr keńesshisiniń aıtýynsha, budan bylaı attestatty tek qorytyndy emtıhan tapsyrǵannan keıin ǵana alýǵa bolady.  «Bıylǵa deıin oqýshylardyń bir bóligi UBT tapsyrmaǵan, aılada, qorytyndy baǵalaryna sáıkes attestattaryn alyp otyrǵan. Barlyǵy úshin birdeı qorytyndy emtıhan ótkizilmegen. UBT tapsyrýdan bas tartqan oqýshy attestatyn alyp kete bergen. Endi mundaı oqýshylar da emtıhanǵa daıyndalatyn bolady. Barlyǵy qorytyndy attestattaýdan ótedi», – dedi ol.  Sondaı-aq ústimizdegi jyly granttar sany kóbeıetini belgili boldy.  «Eger ótken jyly memleketten 37 932 grant bólinse, bıyl olardyń sany 40 myńnan asady. Bakalavrǵa bólinetin granttar sany burynǵydan 3,5 myńǵa kóp. Sondaı-aq pedagogıkalyq mamandyqtarǵa granttar kóbeıtildi, – dep málimdedi M.Taıkenova.