Aýyl ana bir jyldardaǵy qıyndyqtardan birte-birte qutylyp keledi. Degenmen, keıbir jastardyń áli de týǵan jerine turaqtaı almaı, qala jaǵalap ketip jatqandary oılantpaı qoımaıdy. Elbasynyń joǵaryda aıtqan maqalasynyń bir tarmaǵynda «Týǵan jer» baǵdarlamasyn qolǵa alýdy usynypty. Bul – quptarlyq is. Qazaqtyń baıtaq dalasyn osy baǵdarlama aıasynda kórkeıtpesek bolmaıdy. Prezıdent budan burynǵy bir sózinde elimizdi asyraıtyn aýyl ekenin de aıtqan. Al myna maqalany aýyl halqy oqı otyryp, syrtta júrgen azamattarynyń elge oralsa, olaı bolmaǵan jaǵdaıda kómek qoldaryn sozsa degen oılaryn aıtýda.
Eldi mekenderde shaǵyn sharýashylyqtar men qojalyqtar, ózge de ujymdar bar. Olar shamalaryna qaraı kómekterin berip, demeýshilik kórsetip jatyr. Maqalada týǵan jer – árkimniń shyr etip jerge túsken, baýyrynda eńbektep, qaz basqan qasıetti mekeni, talaı jannyń ómir-baqı turatyn ólkesi. Ony qaıda júrse de júreginiń túbinde áldılep ótpeıtin jan balasy bolmaıdy, depti. Bul – aqıqat sóz. Syrtta júrgender aýylǵa saǵynyshpen keledi. Ata-babalarynyń, ákeleriniń izi qalǵan jerlerdi aralap qaıtady. Endigi jerde myna dúnıedegi rýhyńdy oıatyp, sanańdy sergitetin ulttyq ıdeıalarǵa aýyldaǵy biz de óz úlesimizdi qalaı qosamyz degen máselemen aınalysyp jatyrmyz. Jaqsy isimizben ózgelerge, ásirese, jastarǵa úlgi bolsaq deımiz. Sóıte otyryp, «...basqa aımaqtarǵa kóship ketse de týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp qoldaý kerek. Bul – qalypty jáne shynaıy patrıottyq sezim, ol árkimde bolýy múmkin. Oǵan tyıym salmaı, kerisinshe, yntalandyrý kerek», degen Memleket basshynyń sózinde úlken shyndyq jatyr. Osyny ár aýyldan shyqqan azamattar, ásirese, qarjysy bar kásipkerler tereń zerdelep, kindik qany tamǵan jerine kómek kórsetip, onyń ishinde bilim uıalarynyń, rýhanı mádenı ortalyqtarynyń túleýine túrtki bolyp jatsa, nur ústine nur bolar edi.
Aýyl jurty ondaı eren jandarǵa erekshe qurmet kórsetip, iltıpat tanytar edi. Iá, aýylyn kórkeıtýge rýhanı da, qarjylyq jaǵynan da demeýshilik jasap júrgen jaısań jandar joq emes, bar. Qazirshe olar sanaýly ǵana bolyp tur. Tipti, aýyldaǵy aýqattylar men qalada turyp jatqan kásipkerler birigip qımyl jasasa, olardyń kindik qany tamǵan aýyldyń ajary kirip, úlkender aǵynan jarylyp batasyn berse, jastar olardyń mundaı qamqorlyǵyna tánti bolýymen qatar, «Bolmasa da uqsap baǵary» anyq.
Sózimniń qorytyndysynda aıtarym, ulttyq rýhyńdy oıatatyn bul maqalany tamsanyp oqyp qoıý jetkiliksiz. Osynda kórsetilgen naqty isterdi júzege asyrýǵa tıistimiz. Bul el bolyp uıysyp, jurt bolyp judyryqtaı jumylyp atqaratyn mindet qana emes, qaryz da paryz.
Káribaı QOJAǴUL, máslıhat depýtaty, eńbek ardageri
Almaty oblysy, Uıǵyr aýdany