Bıyl Aqtóbe oblysynda 641 myń gektar jerge egin egý josparlanǵan. Egis alqaptary 2016 jylmen salystyrǵanda 74,2 myń gektarǵa ulǵaıatyn bolady. Dándi-daqyldar egýge 383,9 gektar jer belgilengen. Aýa raıy qolaıly bolǵan jaǵdaıda 480 myń tonna astyq jınalady dep boljanýda.
Qazirgi tańda Aqtóbe qalasy men oblys aýdandarynda egin egý jumystary belsendi júrýde. Aýyl sharýashylyǵy basqarmasynyń málimeti boıynsha óńirdegi aýyl sharýashylyq qurylymdary kóktemgi dalalyq jumystardy júrgizý úshin sapaly tuqymdyq materıaldarmen, tehnıkamen jáne janarmaımen tolyqtaı qamtamasyz etilgen. Atap aıtqanda, QR AShM bólgen 8,8 myń tonna arzandatylǵan dızel otyny Aqtóbege tolyq mólsherde jetkizildi.
Aıta ketý kerek, aýa raıynyń qolaısyzdyǵyna baılanysty óńirdegi egin egý jumystary kesheýildep bastaldy. Alaıda, Qarǵaly aýdanynyń sharýalary mamyr aıynyń aıaǵyna deıin bul jumysty aıaqtap úlgeretindikterine senimdi. Oblys ákiminiń aýdandaǵy iri sharýa qojalyqtarynyń ókilderimen kezdesýi kezinde sondaı-aq, egistikke sapasy ekinshi sanattan tómen emes tuqym sebiletindigi aıtyldy.
"Eń bastysy – egis salý merzimin sozbaý, qazir sizder bar kúshterińiz ben qorlaryńyzdy kóktemgi egin egý naýqanyn ýaqytynda aıaqtaý úshin jumsaýlaryńyz kerek. Tuqymnyń sapaly bolýy – ónimdi mol alýdyń kepili. Bul másele talaı aıtyldy. Endigi jaýapkershilik aýdan ákiminen suralady. Azyq-túlik qaýipsizdigin júzege asyrýda negizgi kúsh aýyl aýyl sharýashylyǵyna túsedi. Sondyqtan biz egis alqaptaryn ulǵaıtyp, paıdalanylmaı jatqan jerlerdi qaıtaryp alý jumystaryn jalǵastyra beretin bolamyz. Sharýa qojalyqtary topyraq qunarlylyǵyn saqtaı otyryp, tyńaıtqyshtardy paıdalaný, alqap ónimdiligin arttyrý, tehnıkany jańǵyrtý jumystarymen de shuǵyldanýy tıis. Qazirgi kezde osy sharýalardyń barlyǵyna memlekettik qoldaý tetikteri engizildi, másele – solardy tıimdi paıdalanýda", dep atap kórsetti oblys ákimi.
Berdibek Saparbaev sonymen qatar, kóp salaly sharýashylyqtardyń damýy úshin múmkindikteri mol ekendigin aıtyp, aýyl sharýashylyǵy salasynda eńbek etetinderdiń eginshilikpen qatar, mal sharýashylyǵymen de aınalysýlary qajet ekendigin aıtty. Aýdan basshylyǵyna jumys istep turǵan aýylsharýashylyq kooperatıvteriniń tıimdiligin arttyryp, aýyl sharýashylyǵynyń osy óńir úshin dástúrli emes túrin damytý sharalaryn qabyldaý tapsyryldy.
Kezdesý barysynda paıdalanylmaǵan sýarmaly jerlerdi ıgerý máselesi kóterildi. Bıyl oblystaǵy sýarmaly jerler alańyn 3,2 myń gektardan 21,5 myń gektarǵa deıin keńeıtý josparlanýda.
"Sýarmaly jerler Qarǵaly aýdanynda kóp. О́kinishke qaraı, olardyń jalpy aýmaǵynyń 33%-y ǵana aınalymda. Biz azyq-túlikti kóp berýge múmkindigi bar sýarmaly jerler alańyn barynsha keńeıtip, maldy jem-shóppen qamtamasyz etip, jumys oryndaryn qurýymyz kerek. Jalpy, oblystyń basqa aýdandarymen salystyrǵanda sizderde aýylsharýashylyǵyn júrgizý úshin jaǵdaı jaqsy. Eger barlyq áleýet paıdalanylsa, Qarǵaly aýdany jalpy Aqtóbe aýmaǵyn negizgi aýylsharýashylyq ónimderimen qamtamasyz eter edi", dedi oblys ákimi.
Kezdesýdi qorytyndylaǵan Berdibek Saparbaev oǵan qatysýshylardyń barlyǵyn, sonyń ishinde aýdan basshylyǵyn «Týǵan jerge taǵzym» aksııasyna qatysyp, kóktemgi sý tasqynynan zardap shekken aqtóbelikterdiń baspanamen qamtylýyna qolǵabys etýge shaqyrdy.
Jumys sapary barysynda óńir basshysy sondaı-aq, Qarǵaly aýdanynyń birneshe eldi mekenderiniń turǵyndarymen kezdesip, aýylsharýashylyq kooperatıvteriniń jumysymen, birqatar áleýmettik nysandardyń qurlysymen tanysty. Sonyń ishinde, oblys ákimi Sh.Qaldaıaqov aýylyndaǵy dárigerlik ambýlatorııanyń qyzmetimen tanysyp, mekeme basshylyǵyna jedel járdem kóliginiń kiltin tabystady.