Zań jobasynda zeınetker jasyndaǵy azamattardyń laıyqty ómir súrý deńgeıin qamtamasyz etý maqsatynda áleýmettik jáne zeınetaqy zańnamasyn jetildirý, sondaı-aq balaly otbasylardy jáne azamattardyń osal sanattaryn qoldaý jónindegi sharalardy kúsheıtý qajettigi aıtylady.
«Zań jobasynda zeınetaqy zańnamasyna birqatar ózgerister engizý kózdelgen. Birinshiden, Elbasynyń bıylǵy Joldaýynda bergen tapsyrmasyna sáıkes, 2017-2018 jyldary bıýdjetten tólenetin zeınetaqylar mólsheri úsh kezeńdik negizde arttyrylatyn bolady. Birinshi kezeńde, ıaǵnı 2017 jylǵy 1 qańtardan bastap yntymaqty zeınetaqylar mólsheri 9 paıyzǵa, bazalyq zeınetaqy – 7 paıyzǵa artty. Al, ekinshi kezeńde, 2017 jyldyń 1 shildesinen bastap: yntymaqty zeınetaqy mólsheri 11 paıyzǵa; bazalyq zeınetaqy mólsheri 13 paıyzǵa kóbeıtilgeli otyr. Nátıjesinde, 1 shildeden bastap zeınetaqy mólsherlerin 2016 jylǵy zeınetaqy mólsherimen salystyrǵanda 20 paıyzǵa deıin arttyrý qamtamasyz etiledi. Sonda eń tómengi zeınetaqy mólsheri 45 711 teńgege deıin, al ortasha zeınetaqy 66 676 deıin arttyrylatyn bolady. Bul arttyrý eldegi 2 mıllıonnan astam zeınetkerdi túgel qamtıdy», – dedi T.Dúısenova.
Mınıstrdiń túsindirýinshe, zeınetaqyny arttyrýdyń úshinshi kezeńi 2018 jyldyń 1 shildesinen bastap júrgiziledi dep kútilýde. Ol bazalyq zeınetaqyny taǵaıyndaý ádistemesiniń ózgerýimen baılanysty bolmaq.
«Búgingi tańda bazalyq zeınetaqy zeınetkerlik jasqa jetken adamdarǵa birdeı mólsherde taǵaıyndalady. Endigi jerde jańa ádistemege sáıkes, ol zeınetaqy júıesine qatysý ótiline baılanysty naqtylanady. Bul rette 1998 jylǵa deıingi eńbek ótili jáne 1998 jyldan keıingi jınaqtaýshy zeınetaqy júıesine aýdarylǵan zeınetaqy jınaqtarynyń merzimi eskeriletindigin atap ótkim keledi», – dedi ol óz baıandamasynda.
Sondaı-aq, jalpy otyrys aıasynda depýtattar «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady. Qujat boıynsha baıandama jasaǵan Májilistiń Áleýmettik-mádenı damý komıtetiniń múshesi, depýtat Záýresh Amanjolova zań jobasy mindetti áleýmettik medısınalyq saqtandyrý jaǵdaılarynda halyqqa medısınalyq kómek kórsetýdi jetildirý maqsatynda ázirlengendigin atap ótti. Onda aýdarymdar men jarnalardyń mólsherlemeleri men olardy esepteý obektilerin ózgertý; jańa tóleýshiler sanattaryn jáne jarnalaryn tóleýdi memleket júzege asyratyn adamdardyń sanattaryn engizý; mindetti áleýmettik medısınalyq saqtandyrý jáne tegin medısınalyq kómektiń kepildik berilgen kólemi júıesinde halyqty dárilik qamtamasyz etý; Áleýmettik medısınalyq saqtandyrý qorynyń jumysyn uıymdastyrý; áskerı qyzmetshilerge, quqyq qorǵaý jáne arnaýly memlekettik organdardyń qyzmetkerlerine jáne olardyń otbasy múshelerine medısınalyq kómek kórsetý tártibi synda máseleler kózdeledi.
Osy kúni depýtattardyń maquldaýyna ıe bolǵan qujattyń biri «Qazaqstan Úkimeti men Qyrǵyzstan Úkimeti arasyndaǵy eýrazııalyq ekonomıkalyq ıntegrasııa jaǵdaıynda ekonomıkalyq yntymaqtastyqty damytý týraly kelisimdi ratıfıkasııalaý týraly» zań jobasy edi. 2014 jylǵy 7 qarashada Qazaqstan men Qyrǵyzstan arasyndaǵy Joǵarǵy Memleketaralyq keńes otyrysynyń aıasynda memleket basshylary bergen tapsyrmaǵa sáıkes ázirlengen Qujatty Ulttyq ekonomıka mınıstri Tımýr Súleımenov tanystyrdy. Sondyqtan da Kelisim normalaryna sáıkes, Qazaqstan tarapy Qyrǵyzstannyń Eýrazııalyq ekonomıkalyq odaqqa ıntegrasııasy prosesine járdemdesý maqsatynda atalǵan elge 100 mln AQSh dollaryna teń kómek kórsetedi. Kómek qyrǵyz tarapyna Eýrazııalyq ekonomıkalyq odaqqa qosylýy jónindegi «Jol kartalarynda» kózdelgen sharalardy iske asyrýǵa, atap aıtqanda EAEO kedendik shekarasynyń qyrǵyz ýchaskesinde kedendik ınfraqurylymdy jaqsartýǵa, Qyrǵyzstannyń sanıtarlyq, veterınarlyq, fıtosanıtarlyq júıelerin EAEO talaptarymen sáıkestendirýge beriledi dep naqtylanǵan.
Aıta keteıik, otyrys aıasynda «Qazaqstan Respýblıkasy Úkimetiniń jáne Respýblıkalyq bıýdjettiń atqarylýyn baqylaý jónindegi esep komıtetiniń 2016 jylǵy respýblıkalyq bıýdjettiń atqarylýy týraly esepteri» men «Memlekettik aýdıt jáne qarjylyq baqylaý týraly Qazaqstan Respýblıkasy Zańyna tolyqtyrýlar engizý jaıynda» jáne «Qarý saýdasy týraly shartty ratıfıkasııalaý týraly» zań jobalaryna qorytyndy ázirleýdi qolǵa aldy.
Nurlybek DOSYBAI, «Egemen Qazaqstan»