Basqosýda «Samuryq-Qazyna» AQ basqarma tóraǵasy О́mirzaq Shókeev kompanııanyń eńbek áýletterin merekelerimen quttyqtady. «Samuryq-Qazynada» 300 myńǵa tarta adam jumys isteıdi. Kompanııa ujymynyń qyzmetine kóp nárse baılanysty. Biz daǵdarysty eńserip, aýqymdy jobalardy qolǵa aldyq. Bul kúndi Halyqaralyq otbasy kúnimen tuspa-tus keltirip otyrǵanymyz da kezdeısoqtyq emes. Sebebi, bul – bizdiń meıram», degen basqarma tóraǵasy saltanatty sharaǵa qatysýshylarǵa sáttilik, shańyraqtaryna bereke tiledi. Sonymen qatar, ár jumysshynyń kúsh-jigerin, eńbegin árkez baǵalaıtyndaryn aıtty. Bıyl «Qordyń eńbek áýleti» medaldaryn Babashevtar, Saırambaevtar, Trýbalar, Klopovtar, Pshenısınder, Eltaevtar, Masıýkter, Jamankózovter, Kákimanovtar, Musaǵalıevter áýleti ıelendi. Keıbir áýletterdiń eńbek ótili 300 jyldan asady. Aıtalyq, «Taý-ken Samuryq» kompanııasynda qyzmet etetin Babashevtar áýletiniń eńbek joly 373 jylǵa jalǵasady. Al Saırambaevtar otbasy 317 jyldan beri urpaqtan urpaqqa mura bolǵan bir salanyń qyzmetin óristetip keledi. «Bizdiń temir jol salasyndaǵy áýlettik eńbek jolyn ákemiz Saırambaı Maxanbet sonaý 1928 jyly bastaǵan. Sonda 1974 jylǵa deıin eńbek etti. Biz alty bala ákemizdiń jolyn qýdyq. Izin jalǵap kelemiz. Búgin – aǵa býyn úshin qýanyshty kún, al jastarymyzǵa úlgi. Bizdiń áýlettiń eńbek ótili 300 jyldan asady, bul – erekshe maqtanysh», deıdi «Qazaqstan temir joly» UK standarttaý, sertıfıkattaý jáne metrologııa ortalyǵynyń basshysy Esentur Saırambaev.
Ashat RAIQUL,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»