О́tken oqý jylynda mektep bitirgen 70 túlektiń 57-si «Altyn belgi» úmitkeri bolyp, onyń 40-y úmitti aqtap shyqqan. Jyl saıyn jalpy orta balldyń kórsetkishi boıynsha OQO-da kósh bastap júretin mektep respýblıka boıynsha aldyńǵy úshtikten túspeıdi.
Bilim uıasyn 28 jyldan beri basqaryp kele jatqan dırektor О́mirhan Qozybaq mundaı nátıjege qol jetkizý talaı jyldan bergi jumystyń nátıjesi ekendigin aıtady. Bul mekteptiń taǵy bir erekshiligi, basqarý júıesi jańa zamanǵa saı laıyqtalǵan.
«UBT synaǵyna daıyndalýda, «Altyn belgi» men úzdik attestatty kóbirek alýymyzda eshqandaı qupııa nemese jasyryn syr joq. Bizdiń mektepte apta saıyn 10-11 synyp oqýshylarynan baıqaý synaǵy alynady. Tómen ball jınaǵan oqýshylarmen jeke jumys isteımiz. Ár jyl saıyn pán muǵalimderi jańa suraqtarmen tolyqtyryp, jańa test varıanttaryn kiriktirip otyrady», deıdi mektep dırektory О́mirhan Qozybaq.
Mektep-gımnazııanyń taǵy bir ereksheligi – matematıka pánin oqytýǵa aıryqsha nazar aýdarady. Bul – tek osy pánge artyqshylyq jasaý emes. Matematıka arqyly ózge sabaqtardy oqytýdyń da sapasyn arttyra túsýdi maqsat etedi. Bul oqý ornyn Maqtaaraldyń altyn mektebi dese de ábden jarasady.
Baýyrjan Momyshuly atyndaǵy mektep-gımnazııany kóp jyldan beri izdenimpaz, jańashyl ustaz О́mirhan Qozybaq basqarady. Shırek ǵasyrlyq muǵalimdik tájirıbesi bar dırektorǵa qazir búkil Ońtústik óńiri qyzyǵady. Mundaǵy muǵalimder Kembrıdj ádis-tásili boıynsha arnaıy daıarlyqtan ótip kelip, jumystarynda paıdalanýda.