Tas músindi áspettegenshe olaq músinshilerdiń qolynan shyqqan molaq músinderdi qalpyna keltirýdi oılasqan durys bolar edi

24 tamyz kúni Petropavl qalalyq jumyspen qamtý jáne áleýmettik baǵ­darlamalar bólimi janyndaǵy alań­qaıǵa eskertkish ornatyldy. Kim­niń deısiz ǵoı? Lenınniń! Iá, ıá, shortandaı shorshyp túspeńiz. «Estimegen elde kóp, esek mingen sartta kóp» degen osy. Elbasymyz bastaǵan Qazaqstan halqy mártebemizdi kóte­rip, mereıimizdi asyratyn Táýel­siz­diktiń 20 jyldyǵyn eńseli istermen qarsy alý sharalaryna jumyla kiriskende, jergilikti bıliktiń bul qyly­ǵyn túsine almaı dalmyz. Bizge málim bolǵanyndaı, Qazaq­stan Halyqtyq kommýnıstik partııa­sy­nyń oblystyq fılıaly burynǵy et kombınatynda esh eskerýsiz turǵan tas músindi kópshilik serýendeıtin jerge qoıýdy Petropavl qalalyq ák­im­diginen ótinip, úshbý hat joldaǵan. Kózqarasy men ustanymy ártúrli saıa­sı uıymdy qalalyq ardagerler ke­ńesi men máslıhattyń qoshtaı jóne­lýi túsiniksiz. Máseleniń qala ákimi Nurjan Áshimbetov tóraǵalyq etken qala qurylysy keńesinde qaralyp, qoldaý tabýy da esh aqylǵa syı­maı­dy. Ákimdiktiń baspasóz qyzmetiniń oqıǵaǵa aıryqsha mańyz bergeni son­shalyq, jergilikti basylymdar arqy­ly jar salyp, jerden jeti qoıan tapqandaı máz boldy. Erekshe belsendilik tanytqan ardagerler uıymy da, basqa qoldaýshylar da tas músindi mańyzy bar arhıtektýralyq, mádenı eskertkishke jatqyzý qısynsyz­dy­ǵyn bile tura «kún kósemin» qor­ǵashtap álek. «Aıtpasań sózdiń atasy óledi» demekshi, reti kelip qalǵannan keıin kó­ńilimizde júrgen myna jáıtti ortaǵa salǵandy jón kórdik. Byltyr oblys ortalyǵynyń ár jerinde jan-ja­ný­ar­­lar men adamdar beınelengen gúl­zar­lar men saıabaqtar paıda boldy. So­lardyń biri Pýshkın jáne Sútishev kósheleriniń qıylysyna ornalasqan. Qara jerdi tósenish etip otyrǵan qa­zaqtyń qara shalynyń myjyraıǵan malaqaı sekildi júdeý túrine, qur súlderine kóz jiberip, bastapqyda asharshylyq qurbandaryna qoıylǵan belgige balaǵanbyz. Tek qolyndaǵy aspabyna qarap (qobyz ekenin áreń ajyrattyq) qobyzshy eken ǵoı dep topshyladyq. Iá, Asanqaıǵy, ıá Qor­qyt baba deıin deseń, usqynynan adam shoshıdy. Bir jerde kórgen sı­ıaq­tymyz. Esimizge tústi. Úıge kelgesin nemeremizdiń boqshantaıyn aqta­ra bastadyq. «Aldardyń shaıtandy al­daýy» sýretti kitapshasy kózimizge ottaı basyldy. Anyq sol. Kóshi­rin­disi sekildi, aýmaıdy-aý! Jerdiń jyr­­tyǵy bolsa kirip ketýge barsyń. Al «Fregat» saýda úıi janynda «ja­ıylyp júrgen» qulyndy bıeden áýdem jerde maldas qurǵan qazaqtyń taǵy bir myjyraıǵan shaly otyr. Qolynda – kárlen kese. Alǵa qaraı umsyna túsken. Músinshiniń dárý sý­syndy bappen ishken jannyń beınesin bermek oıy sátsiz shyqqan. Onyń qasynan árli-berli ótken-ketken keı­bireýlerdiń qol jaıǵan qaıyrshyǵa uqsatyp, kesege tıyn tastap ketetinin sol mańaıda turatyn talaı adam­nyń aýzynan estidik. О́zimniń de kýá bolǵanym bar. Olaq músinshilerdiń ulttyq namysqa tıetin osyndaı mo­laq dúnıelerin túzetý, qalpyna keltirý jóninde qansha aıtylyp kele jatsa da, esh eskeriler emes. Osynyń al­dynda ǵana ortalyq demalys saıaba­ǵyn­da elimizdiń tanymal tulǵala­ry­na arnalǵan eskertkishterdiń sıyq­syz­dyǵynan birazy alyp tastalǵan bolatyn. Endi, mine, oblys ákimi Serik Bi­lálovtiń «20 ıgi is» sharasyn qoldap, Táýelsizdigimizge qatysty jan ja­dy­ratar aýqymdy jumystardy óris­te­týdiń ornyna arhıtektýralyq, máde­nı eskertkishter men tas músindi sha­tas­tyrǵan «shala shekspırler» men «to­lyspaǵan tolstoılardyń» bul áre­keti el shejiresindegi erekshe beleske degen «syıy» bolar, sirá?! Son­shalyqty áspetteıtindeı, qala­nyń qaq tórine qoıatyndaı Lenın qazir kim edi?! О́mir ESQALI, Soltústik Qazaqstan oblysy.