«Kóne zamannan tarıh pen rýhanııattyń ortalyǵyna aınalǵan Ońtústik Qazaqstanda respýblıka boıynsha tarıhı-mádenı eskertkishterdiń 80 paıyzdan astamy ornalasqan. Sondyqtan, ólkemizde týrızm ındýstrııasyn jan-jaqty damytýǵa barlyq múmkindikter bar. Búgingi kúni osy baǵytty damytý úshin 3 basymdyqqa kóńil aýdaryp otyrmyz. Birinshisi – týrıstik ınfraqurylymdy damytý, onyń ishinde serpindi jobalardy júzege asyrý. Olar Túrkistan, Shardara, Saryaǵash, Qasqasý keshenderi. Ekinshisi – qyzmet kórsetý sapasyn arttyrý bolsa, úshinshi – basymdyq óńirdiń týrıstik áleýetin nasıhattaý jáne jarnamalaý», dep atap ótti ákim.
Máselen, oblysta «Qasqasý» taý-shańǵy kýrorty, «Saryaǵash» jańa kýrort qalashyǵy, Túrkistan men Otyrarda tarıhı-tanymdyq týrızm kesheni, al Shardarada jaǵajaı týrızmi damytylatyn bolady. Nátıjesinde, 2021 jyly ishki týrızm kólemin 220 000 adamǵa jáne kirý týrızminiń kólemin 20 000 adamǵa arttyrý josparlanýda.
Sonymen birge, oblysta týrızm ındýstrııasynyń damýyna Elbasymen usynylǵan «Qazaqstannyń qasıetti rýhanı qundylyqtary», «Qazaqstannyń kıeli jerleriniń geografııasy», «Mádenı-geografııalyq beldeý» jobalary úlken úlesin qosqaly otyr.
Naqty aıtqanda, «Hanqorǵan», «Saıram», «Eski shahar, Shymkent», «Kúltóbe», «Kóne Túrkistan», «Oqsyz» arnaıy baǵyttary ashylǵan jaǵdaıda kóptegen jumys oryndary ashylyp, salyq kóbeıip, týrıstik saýda túrleri damıdy.