«El ishi – óner kenishi» degendeı, atalǵan ulttyq joba el ishinen talantty búldirshinderdi taýyp, olardyń jolyn óner álemine ashyp keledi. Sondaı-aq, balalardyń án shyǵarmashylyǵyn damytý jáne qoldaý, balalardyń mýzykalyq bilim alýyna jáne tárbıesine qatysty suraqtarǵa qoǵamnyń nazaryn aýdarý jáne jalpy adamdyq qundylyqtardy ashý men damytý maqsatynda uıymdastyrylyp otyrǵan jobanyń alǵashqy kezeńi Pavlodar qalasynan bastaý aldy. Osy ýaqytqa deıin Pavlodar, О́skemen, Almaty qalalarynda uıymdastyrylǵan «Bala daýysy – 2017!» ulttyq baıqaýy senbi kúni Taraz qalasynda ótti. Balalaryn ulttyq ónerge baýlyǵan ata-analar bul kúni qalalyq mádenıet úıin betke alyp, búldirshinderdiń ónerine kýá boldy.
Bul baıqaý – qandaı da bir kommersııalyq maqsattardy kózdemeıtin qazaqstandyq brendke aınalý jáne Astana, Almaty qalalary men elimizdegi barlyq oblys ortalyqtaryn qamtıtyn joba. Sondaı-aq, Aıqyn Tólepbergen, Maqpal Isabekova sııaqty belgili estrada ánshileri de talantty balalarmen jumys isteıdi eken. Osylaı degen joba menedjeri Tolǵanaı Hasen «Bala daýysy – 2017!» baıqaýynyń artyqshylyqtary jóninde de áńgimeledi.
«Eger baıqaýǵa qatysýshy balalar sany 500-den assa, 2 jeńimpaz anyqtalady. Jeńimpaz balalarǵa elimizdegi óner salasyndaǵy joǵary oqý oryndaryna túsýge múmkindik bar. Sondaı-aq, Fransııa memleketiniń astanasy Parıj qalasyna saıahatqa joldama beriledi. Taǵy aıta ketetin bir jaıt, fınalǵa shyqqan árbir balamen bizdiń mamandar jumys isteıdi», deıdi Tolǵanaı Hasen.
Taraz qalasynda ótken «Bala daýysy – 2017!» ulttyq baıqaýyna 172 talapker búldirshin qatysty. Baıqaý barysynda qazylar alqasynyń sheshimimen 12 jasar Dııar Baqyt júzden júırik shyǵyp, jeńimpaz atandy. Aldaǵy ýaqytta jeńimpazben birge «Asyl» tobynyń ánshisi Aqerke Búrkitbaı birlese jumys isteıtin bolady. Al marapattaý kezeńinde Dııardyń anasy Ásem Mahasheva sóz alyp, joba jetekshileri men uıymdastyrýshylarǵa alǵysyn bildirdi.
Aıta keteıik, atalǵan baıqaýdyń alǵashqy jylynda Áýlıeatanyń namysyn qorǵaǵan Aılýn Zaýshova jeńimpaz atanǵan bolatyn. Endi Dııardyń juldyzy jarqyrady. Taraz topyraǵynan taǵy bir talantty ónerpaz óner álemine qanat qaqty.
«Bala daýysy – 2017!» ulttyq baıqaýy endi Shymkent qalasynda jalǵasady. Sondaı-aq, elimizdiń ózge de óńirlerinde bolyp, el ishindegi ónerli balalardy elge tanytýda eseli eńbek etedi.
Hamıt Esaman, «Egemen Qazaqstan»