Aqmola oblysynyń dıqandary bıyl 4,5 mıllıon gektar eginnen mol ónim alýǵa úmitti. Aýyl sharýashylyǵy qurylymdary ústimizdegi jyly dándi daqyldar alqabyn byltyrǵyǵa qaraǵanda 124,6 myń, maıly daqyldar aýmaǵyn 61,8 myń gektarǵa ulǵaıtty. Naýqan synyna 9 myńnan astam kombaın jumyldyrylsa, munyń 923-i sheteldik qýatty tehnıkalar. Jańa eginniń astyǵyn qabyldaýǵa 544 mehanıkalyq qyrman, 612 avtotarazy, 167 dana dán keptirgish daıyndaldy. Munyń ózi bitik egindi qysqa merzimde ári ysyrapsyz jınap alýǵa múmkindik beredi.
Keshe alǵashqy bolyp oraqqa kirisken Jarqaıyń aýdany 508222 gektarǵa dándi jáne burshaq daqyldaryn ekken edi. Ásirese, «Internasıonal Astana», «Ken-M», «Aqtóbe-O» jaýapkershiligi shekteýli seriktestikterinde egin jınaý qarqyndy júrgizilýde. Internasıonaldyq mehanızatorlar bir kúnde 2000 gektardyń eginin destege jyǵyp, 200 gektardyń astyǵyn bastyrdy. Qazirshe gektar túsimdiligi 14 sentnerden aınalýda. Al, qalǵan eki sharýashylyqta sáıkesinshe 360 jáne 450 gektar alqaptyń egini jınaldy. Bularda gektar berekeliligi 27 sentner bolyp otyr.
Baqbergen AMALBEK,
Aqmola oblysy,
Jarqaıyń aýdany.