Qazaqstan Respýblıkasynyń Tuńǵysh Prezıdentiniń qorynda kóp balaly jáne az qamtamasyz etilgen otbasylarǵa qoldaý kórsetý maqsatynda bilim kúnine arnalǵan shara bolyp ótti.
«Mektepke jol» degen atpen respýblıka kóleminde ótkizilip otyrǵan bul shara, Elbasynyń bolashaq bilimdar urpaq tárbıesine kóńil aýdarý týraly berilgen tapsyrmasyn júzege asyrý nıetimen bastalǵan edi. Aı basynan beri elimiz boıynsha eki myńnan astam bala mektepke kıetin kıim-keshekpen qatar, sómke, qalam-qaǵaz sekildi oqýshy quraldaryn syıǵa alyp úlgerdi. El qazany men kásipker azamattardyń qoldaý kórsetýi nátıjesinde bıyl 63 mıllıon teńge osy sharaǵa bólinip otyr.
«1 qyrkúıek kúni árbir bala júzi balbul jaınap mektepke barǵysy keledi. Ol kún – mereke, ol kún – qýanysh. Alaıda, balalyqtyń balyn tatý barlyq balanyń baǵy bolmaı tur. Beıbit eldiń balalary bilim alýdan shet qalmasyn degen nıetpen Tuńǵysh Prezıdenttiń qory osyndaı sharany aýqymdyraq ótkizip otyr» dedi, qor dırektorynyń mindetin atqarýshy B.Muhamedjanov.
Bul kúni júzden astam bala syı-sııapat kórip, mektep tabaldyryǵyn alǵash attaǵaly otyrǵan búldirshinder Tuńǵysh Prezıdent qorynyń belgisi beınelengen arnaıy syılyqtarmen marapattaldy. Balalar shyǵarmashylyq ujymdar uıymdastyrǵan konserttik baǵdarlamany tamashalady. Eresekteri Otanymyzdyń damý kezeńin pash etetin elektrondy ekskýrsııaǵa qatysty. Shara Almaty qalalyq balalardyń quqyǵyn qorǵaý departamentimen birlesip ótkizilip otyr.
Qanat ESKENDIR, Almaty.