Keshe Japonııanyń premer-mınıstri Naoto Kan óziniń otstavkaǵa ketetinin málimdedi. Oǵan sebep qoǵamdyq pikirdiń N.Kan úkimetine senim bildirmeıtindiginde bolyp otyr. Sońǵy saýaldamaǵa qaraǵanda, qazirgi úkimettiń isin halyqtyń 15-aq paıyzy qoldaıdy eken.
Halyq seniminiń tómendep ketýine naýryz aıyndaǵy jer silkinisiniń kesirinen bolǵan sýnamıdiń jáne sonyń saldarynan «Fýkýsıma-1» AES-inde oryn alǵan jarylys sebep bolyp otyr. Naoto Kan bıliktegi demokratııalyq partııanyń tóraǵalyǵy qyzmetinen de bas tartýda. Úkimetti endi partııanyń jańa tóraǵasy jasaqtaıdy. Sóıtip, Japonııada sońǵy bes jylda altynshy úkimet otstavkaǵa ketti.
Bireýdiki bireýge baılyq bolmaıdy
Lıvııada soǵys aıaqtalǵan soń eńbekaqy tóleý kesheýildeýi múmkin. Soǵys bastalǵaly halyq onsyz da eńbekaqy kórýden qaldy dep kóterilisshiler muńyn shaǵýy sol eken, BUU Qaýipsizdik Keńesi AQSh-qa Lıvııa esep-shottaryna tıesili tutqynǵa alynǵan 1,5 mlrd. dollardy bosatýǵa ruqsat berdi.
Biraq bul qarajat kóterilisshilerdiń qolyna emes, amerıkalyq jáne halyqaralyq deldal agenttikterdiń qolyna berilmekshi. Sóıtip, Kaddafıdiń baılyǵyn qyzǵanyp, ony tartyp alýdy kózdegender quralaqan qalǵaly otyr. Al eýropalyqtar Lıvııaǵa qaıyrymdylyq kómek jasaımyz dep dámelendirýde.
Qurmetti ataq qurdan-qur berilmeıdi
Tájikstan prezıdenti Emomalı Rahmon Eýropa qaýymdastyǵy Halyqaralyq baılanystar jónindegi keńesiniń sheshimimen «HHI ǵasyrdyń kóshbasshysy» degen qurmetti ataqqa ıe boldy. Marapatty osy keńestiń prezıdenti Anton Karajatabtyń ózi Dýshanbege kelip tapsyrdy.
Bul joǵary ataqqa Tájikstan prezıdenti eldiń tutastyǵyn saqtaýda, azamattardyń abyroıy men adamgershiligine nuqsan keltirmeýde, demokratııalyq úderisterdi qoldaýda jetken tabystary úshin ıe boldy, dep jarııalady memleket basshysynyń baspasóz qyzmeti. Jalpy, sońǵy kezde Tájikstannyń halyqaralyq sharalarǵa qatysý belsendiligi aıtarlyqtaı artyp keledi.
Tanylmaǵan el prezıdentin tańdamaq
Abhazııanyń burynǵy prezıdenti Sergeı Bagapsh mamyr aıynda Máskeýde qaıtys bolǵany belgili. Keshe munda jańa prezıdenttik saılaý bolyp, oǵan úsh adam óz kandıdatýrasyn usynǵan edi. Saılaýdyń alǵashqy qorytyndysy búgin shyǵady.
Reseı jaǵy bul saılaýǵa ashyq yqpal etpeı, úsh kandıdatqa da qarsy emestigin jarııalasa da, BAQ onyń S.Shambaǵa búıregi buratynyn aıtady. Úsheýdiń qatarynda prezıdenttiń mindetin atqarýshy Aleksandr Ankvab, premer-mınıstr Sergeı Shamba jáne oppozısııalyq qaıratker Raýl Hadjımba bar. Árbir kishkentaı eldiń úlken problemasy bolatyny sekildi, mundaǵy saılaýaldy tartys ta barynsha qyzý ótken-tin.
Problemadan qutylǵan qurymaıdy
Cheshenstannyń burynǵy prezıdenti Ahmad Qadyrov marqumnyń 60 jasqa tolýyna baılanysty osy respýblıkanyń BAQ ókilderine bergen suhbatynda Reseı premer-mınıstri Vladımır Pýtın jýrnalısterdi taǵy da óziniń odaǵaılaý sózimen máz etti.
Jýrnalısterdiń: «Qap taýyn Reseıden qıyp alý týraly pikir aıtýshylarǵa qalaı qaraısyz?» degen suraǵyna ol: «Ondaı adamdardyń ózderiniń bir jerin qıyp alý kerek», dep ázildegen. Ile aıtqan salıqaly sózinde: «Problemaly aýmaǵynan qutylǵysy kelgen memlekettiń qurýy da ońaı», degen. Biraq BAQ-tar problemaly aýmaqtan qutylǵan memleketterdiń quryǵany tarıhta bolmaǵanyn, kerisinshe, gúldene bastaǵanyn aýyzǵa alady. Sonyń mysaly retinde 1918 jyly Lenınniń Fınlıandııadan qutylǵanyn aıtady.
Jazyqsyzdardy jarǵanda ne utty?
Nıgerııanyń astanasy Abýdja qalasyndaǵy BUU ǵımaratynyń aldynda joıqyn jarylys boldy. Aldyn ala boljamdarǵa qaraǵanda, bomba jarylǵan delinip otyr. Ázirge adam shyǵyny men keltirilgen zalal týraly aqparat joq.
Afrıkanyń osy memleketin sońǵy ýaqyttarda terrorıster ózderiniń qyryna qatty alyp otyr. Ústimizdegi jylǵy maýsym aıynyń basynda polısııa ǵımaraty turatyn aýdanǵa shabýyl jasaldy. Onda 5 adam ólip, 10 adam jaraqat alǵan edi. Al maýsymnyń aıaǵynda halyqtyń syra iship otyrǵan alańyna motosıklmen kelgen qaraqshylar jarylǵysh zat laqtyrǵan bolatyn. Bul joly 25 adam ólip, 20 shaqtysy jaralandy.
Qysqa qaıyryp aıtqanda:
* Máskeýdiń soltústik-batys okrýginiń IIB aldynda balama kúshi 150 gramdyq trotılge teń jarylys boldy. Belgisiz jan jarylǵysh zatty laqtyryp jiberip, zytyp otyrǵan. Ǵımaratqa zaqym kelgeni bolmasa, eshkim zardap shekpepti.
* Grekııa ókimeti bankterdi bankrottyqtan qutqarý úshin bergen qarajattarynyń qumǵa sińgen sýdaı bolyp ketkenine qaıran qalyp otyr. Eldegi defolt pen salyqtan jaltarǵan bankırler qarjyny shetelge aýdaryp jiberipti.
* Túriktiń Antalıa qalasynyń ortalyǵyndaǵy jaǵajaılardyń birinde jarylys bolyp, odan demalýshylar qatty qorqyp, keıbiri esinen tanyp qalǵan. Biraq adam shyǵyny joq.
Internet materıaldary negizinde ázirlendi.