Oblys ákimi Nurlan Noǵaev pen Qazaqstannyń Ázerbaıjan Respýblıkasyndaǵy Tótenshe jáne ókiletti elshisi Rashad Mammadovtyń kezdesýinde eki tarap arasyndaǵy saýda-ekonomıkalyq baılanysty damytý máselesi aıtyldy. Atyraýda qazir Ázerbaıjan kapıtaly bar 42 kásiporyn jumys isteıdi. Olardyń arasynda metall óńdeý, dárigerlik qyzmet kórsetý, daıyn tamaq ónimderin óndirýmen aınalysatyn kompanııalar bar. Jyl basynan beri qos tarap arasyndaǵy taýar aınalymy 1,8 mlrd AQSh dollaryna jetti. «Biz áriptestik qarym-qatynas ornatý úshin Atyraýǵa iri transulttyq kompanııalardyń ókilderin ákelip jatyrmyz. Aımaqtyń eksporttyq áleýetin zerttegimiz keledi», dedi elshi. Oblysta jalpy aýmaǵy 210 ga ındýstrııalyq aımaq qurylyp jatyr. Investorlarǵa jaǵdaı jasaý úshin ınfraqurylymdy memleket júrgizip beredi. Álemdik standarttarǵa saı ónerkásiptik-óndiristik keshen qurý baǵytynda josparlanǵan sharalar da bar. Investorlar memleket-jekemenshik áriptestigi aıasynda «Atyraý» áleýmettik-kásipkerlik korporasııasy ulttyq kompanııasy» AQ-pen birlesip ártúrli salada ınvestısııalyq jobalardy júzege asyra alady. Bul rette birigip jumys isteý kezinde ulttyq kompanııanyń úlesi 49 paıyzdan aspaýy kerek.
Baqytgúl BABASh, «Egemen Qazaqstan»
ATYRAÝ