Vedomstvo basshysynyń pikirinshe, búgingi tańda Qazaqstannyń geosaıasattaǵy róli arta túsip keledi. Buǵan aıǵaq retinde elimizdiń Uly Jibek jolyn qaıta túletý jónindegi keń aýqymdy ınfraqurylymdyq jobaǵa belsendi qatysýyn aıtýǵa bolady.
– Qazaqstan basshysy «Nurly jol» baǵdarlamasyn jarııa etti. Prezıdenttiń sózine qaraǵanda, joldardy kúretamyr desek, Jibek joly onyń arterııalaryn keńeıte túsedi. Onyń ústine, joǵary sapaly trassalardyń Taldyqorǵan men Oral qalalaryn jalǵap jatqany bir másele, al Lıanıýngan men Shanhaıdan shyǵyp, Qazaqstan aýmaǵy arqyly Eýropa men Reseıdi jalǵaıtyn zamanaýı joldardyń qurylysy basqa másele, – dedi mınıstr. – Prezıdent qaı kezde de teńiz tasymaldaryn mysal retinde keltirip keledi. Olar arzan bolǵanymen, baıaý: Shanhaı portynan shyqqan taýar Rotterdamǵa deıin bir aı júrýi múmkin. Osy jerde biz tasymal ýaqytyn aıtarlyqtaı qysqartýǵa múmkindik beretin balamaly nusqa usyna alamyz.
Osynyń arqasynda elimizdiń geosaıasattaǵy róli artady jáne Qazaqstan tranzıtten aıtarlyqtaı kólemde paıda túsire alady. Sóıtip, teńiz portynda jumys isteıtin barlyq logıstıka qurǵaq portta da jumys isteıtin bolady.
Burnaǵy aptada Qazaqstan qoǵamynda keń talqylanǵan kelesi bir másele – Ázerbaıjannyń bankrotqa ushyraǵan Halyqaralyq bankine Birtutas jınaqtaýshy zeınetaqy qoryndaǵy (BJZQ) jınaqtardy aýdarýmen baılanysty táýekelder bolǵany anyq. Bul arada Dáýren Abaev qazaqstandyqtardyń zeınetaqy jınaqtary memlekettiń kepildiginde bolatyndyǵyna sendirip, túrli baǵyttaǵy qaýesetke núkte qoıǵandaı boldy.
– Qazirgi kezde tekserý jumystary júrgizilip jatyr, al onyń nátıjeleri jurtshylyqqa mindetti túrde jetkiziletin bolady. Qazaqstanda zeınetaqy jınaqtaryna memlekettik kepildeme qarastyrylǵan, al ony eshkim de alyp tastaǵan joq, ol tipti ınflıasııany da eskeredi. Sondyqtan, zeınetaqy tıesili barsha azamat ony alatyn bolady. Bul jerde eshqandaı da kúmán bolmaýy tıis, – dedi vedomstvo basshysy.
Ázerbaıjan úkimeti banktiń qaryzyn tóleý týraly sheshim qabyldaǵan. Sondyqtan, BJZQ-ǵa da, Halyqaralyq bankke qarjy salǵan basqa kompanııalarǵa da eshqandaı qaýip joq.
Bankter arasyndaǵy kelesi bir kelisim – Halyq banki men Qazkommersbanktiń qosylýyna qatysty aıtqanda, Aqparat jáne kommýnıkasııalar mınıstri naqty nátıjelerge qol jetkizbeı turyp, bul kelisimniń ne beretinin dál boljaý qıyn ekenin atap kórsetti. – Bankterdiń qosylýy – qalypty úderis. Bul jerde azamattardyń depozıtterimizdi joǵaltyp almaımyz ba degen alańdaýshylyǵy basqa áńgime. Asa mańyzdy jaıtqa nazar aýdarǵym keledi: Qazkommersbank te, Halyq bank te Qazaqstan azamattary salymdaryna kepildik beretin qarjy qorlaryna qatysýshy bolyp tabylady. Sondyqtan, alańdaýǵa esh negiz joq, – dep sendirdi Dáýren Abaev.