Tańerteńgilik abyr-sabyr. Pavlodar oblysynda týyp-ósip, artynda óshpesteı iz qaldyryp, ádebı-mádenı tarıhymyzda aıryqsha oryn alatyn aıtýly tulǵalar máńgilik qonystanǵan zırattarǵa baryp, taǵzym etip, gúl shoqtaryn qoıý kún tártibinde belgilengen is-sharalardyń biri edi. Qonaq úıdiń kireberisinde áıelder gazet-jýrnal, ony-muny satyp turatyn. Zırat basyna baratyn avtobýsty kútip, qolymyzda kárzińkede deısiz be, jyltyraq sytyrlaq qaǵazǵa oralǵan deısiz be, gúlimiz bar, álgi satýshy áıelderdiń qasynda qara kóbeıtip, shoǵyrlanyp jatqan bolatynbyz. Bir-birimizden «Qaı zıratqa baramyz?» dep surap qoıamyz ara-arasynda. Sony qulaǵy shalyp qalǵan gazet satýshy áıeldiń biri «Kelmeı jatyp bir adamdaryńyz qaıtys bolǵan ba?» demesi bar ma? Al, kerek bolsa...
«Oryssha ıntervıý bermeımin...»
Qara shańyraq – M.Áýezov atyndaǵy Qazaq memlekettik akademııalyq drama teatrynda festıvaldiń jabylýyna arnalǵan is-shara bastalýǵa jaqyn. Munyń aldynda da festıval aýqymyndaǵy is-sharalar Almatynyń ár tusynda bolǵan edi. Birinde – pavlodarlyq sýretshilerdiń kórmesi, ekinshi óner oshaǵynda – orkestrlerdiń konserti, úshinshisinde – júzdesý-kezdesýler... Festıvaldiń jabylý saltanatyna jınalyp jatqan jandardyń kóbi sol mádenı-ádebı sharalarǵa qatysqan adamdar. Sodan alǵan áserleri qandaı eken? Maqsatymyz osy. Onymen qosa jurtqa tanymal óner sańlaqtarynyń qolǵa túse bermeıtini taǵy bar. Almatydan alshaqta turatyn jýrnalısterdiń osyndaı ońtaıly, oraıly sátti qalt jibermeýge tyrysatyny bar ǵoı. Pavlodar oblystyq teleradıokompanııasynyń rejısseri Raıhan Joldasova bar, orys redaksııasynyń redaktory Quralaı Baıandına bar, úsheýmiz «Kimderden ıntervıý alsaq eken» dep kirgen-shyqqan adamdardy kózben sholyp turǵanbyz. Festıvalden habar qazaqsha-oryssha daıyndalatyn bolǵandyqtan, ıntervıý eki tilde bolýy kerek. Meniń júgim jeńil. Al, Quralaıǵa qıyndaý bolyp tur. Bir kezde Sábıt Orazbaev aǵamyz kirip kele jatty. Dýaly sóz aıtatyn ataqty adam. Qos qoldap amandasyp, ıntervıý berýin suradym. Kelisimin berdi. Teleoperatordy shaqyryp, mıkrofondy tekserip, Quralaı suraq berýge endi oqtala berip edi Sábıt aǵa «Qaı tilde?» dedi. Men «Orys tilinde» dedim. «Joq oryssha bermeımin» dep Sábıt aǵa burylyp júre berdi. Pavlodar oblysynda óz ultymyzdyń ókilderi qazaq tilinde sóıleýden at-tonyn ala qashady, al Almatyda kerisinshe.
Ǵalym OMARHAN, «Egemen Qazaqstan»