El shógenshileri Germanııaǵa attanady

Álemniń túkpir-túkpirinen kelgen eń azýly shógen sheberleri bas qosatyn básekede «Astana Polo Club» jáne «Almaty Polo Club» syndy mańdaıaldy komandalarymyz elimizdiń namysyn qorǵaıtyn bolady. Qurylǵanyna nebári 3-4 jyldyń aınalasy bolsa da, Qazaqstan shógen federasııasy aýyz toltyryp aıtarlyqtaı jetistikterge qol jetkizip úlgerdi. Oǵan dálel, «Astana Polo Club» komandasy 2016 jyly Argentınanyń Lýhan qalasynda ótken halyqaralyq týrnırden I orynmen oraldy. Sondaı-aq, 2017 jyly Argentınadaǵy «Santa Catalina Summer Cup» jáne «Torneo Summer Polo Match» halyqaralyq týrnırlerinde bizdiń komandalar sheteldik shógenshilerden oq boıy ozyp, alǵashqy oryndy enshiledi. Bıyl ǵana elimizde jalaýyn kótergen «Almaty Snow Polo Cup» halyqaralyq dodasynda bas júlde óz qanjyǵamyzda qaldy. Shógen oıyny álem boıynsha erekshe tanymaldylyqqa ıe ekendigin eskersek, qazaqstandyq sportshalarymyz da el abyroıyn arttyryp júrgeni anyq.  «Polo sportynyń tarıhy bizdiń bolmysymyzben astasyp jatyr. Sondyqtan, bul tek baı-baǵlandar oınaıtyn bizge tańsyq sport dep qaramaǵanymyz abzal. Polo – ata-babamyzdan mura bolyp qalǵan, kóne zamandarda shógen (shoǵan, chovgan) degen atpen tanymal bolǵan at oıyny. Babalarymyzdyń shógen oıynyn oınaǵandyǵy týraly derekter Júsip Balasaǵunnyń «Qutadǵý bilik», Mahmud Qashqarıdyń «Dıýanı luǵat at-túrik» atty túrki jazba eskertkishterinde aıtylǵan. Bul týraly óz eńbekterinde osy eskertkishterdi túrki tilinen zamanaýı qazaq tiline transkrıpsııalaǵan etnogrof-ǵalym Asqar Egeýbaev jazyp ketken. Aıta bersek bul oıyn túriniń bizge jat emes ekendigin dáleldeıtin tarıhı derekter jetip artylady. 2014 jyldyń jeltoqsan aıynda Argentına astanasy Býenos-Aıres qalasynda ótken Bas Assambleıada Qazaqstan shógen federasııasy Halyqaralyq polo federasııasynyń tolyqqandy múshesi mártebesine ıe boldy. Qazirgi ýaqytta Aqmola, Almaty, Jambyl, Qaraǵandy, Qostanaı jáne Ońtústik Qazaqstan oblystarynda óńirlik federasııalar ashylyp, shógen klýbtary jumys isteýde. Bul oıyn bizdiń qoǵam úshin áleýmettik lıft retinde bolatynyna kózimiz jetip otyr. Komandalardyń quramynda aýyldan shyqqan qazaqtyń qarapaıym qara balalary oınap júr. Olar álemdik órkenıetke osy arqyly qosylyp, tanysady. Keshegi erjúrek erlerdiń uly kóshin jalǵap, attan túspegen qaısar eldiń ulandary ekenin álemge áıgileıdi. Aldymyzda turǵan úlken jarystan tabysty oralamyz degen oıdamyz», – deıdi Qazaqstan shógen federasııasynyń vıse-prezıdenti Sársen Quranbek.  Atalǵan jarysqa elimizdiń namysyn qorǵaıtyn sportshylardy «Astana Polo Club» JM atqarýshy dırektory Aıdyn Jákejanov pen «Almaty Polo Club» klýbynyń dırektory Valerıı Salıkov bastap barmaq. Tartysty dodaǵa el úmitin arqalap bara jatqan shógenshi jigitterge sáttilik tilep, jeńisti joldyń jalǵana berýine tilektestik bildiremiz.  Arman OKTIаBR,  «Egemen Qazaqstan»  ALMATY