HVIII ǵasyrda ómir súrgen ataqty kúıshi, qońyr úndi qobyzdyń qulaǵynda oınaǵan Tilep Aspantaıulynyń esimi qor qyzyndaı qulpyrǵan Saryqyz sulýmen tikeleı baılanysty. Kıeli qobyz úni tabystyrǵan ǵashyqtardyń bir-birine degen shynaıy sezimi, ystyq yqylasy kórermen júregin selt etkizbeı qoımaıdy. Myna jalǵan dúnıeniń ótkinshi ekenine, bári de óter, keter, tek máńgilik mahabbatyń ólmeıtinine kóz jetkizdiredi. Adam balasyna berilgen sanaýly ǵumyrdyń mánin uǵyndyrady, sanańda júrgen sansyz oılarǵa jaýap izdeıdi. Shyǵarmada halqymyzdyń ulttyq salt dástúri men sabaqtastyǵy aıqyn kórinis tapqan. Sondaı aq, sahnanyń sánin dekorasııalyq tustary asha túskendeı. Qalyń ný orman, syńsyǵan toǵaı, shyqylyqtaǵan qustar úni, qobyzdyń muńly daýysy, dombyranyń shanaǵynan tógilgen án sol zamannyń beınesin kóz aldyńyzǵa ákeledi. «Kezinde Torǵaı óńirinde Tilep degen myqty qobyzshy, baqsy bolǵan eken. Birde sonyń jetinshi urpaǵy astanalyq Sapar Ysqaqov maǵan kelip, usynys aıtty. Men teatrdyń kórkemdik jaǵyna qarjylyq qoldaý jasaıyn, osy shyǵarmany qoıyp kórseńizder, dedi. Astanadan «Qobyz saraıyn» salǵyzǵan da osy azamat bolatyn. Budan buryn bul shyǵarma boıynsha aǵylshyndar balet qoıǵan. Ol qoıylym Almatyda kórsetilgen bolatyn. Bul týyndy da kóńilimizden shyǵyp, halyqqa usynyp otyrmyz, − deıdi rejısser, Qazaqstannyń eńbek sińirgen qaıratkeri Nurqanat Jaqypbaı. Aıta keteıik, shyǵarma N.Aıtulynyń «Saryqyz» poemasynyń jelisi boıynsha jazylǵan. Avtory − Som Júrek Nazar. Qoıýshy sýretshi − Erlan Tuıaqov. Bas keıipker Tilepti – Muhtarhan Manap, Tileptiń jas kezin – Meıirǵat Amangeldın, Saryqyzdy – Nazerke Serikbolova somdap shyqty. Aıman Muqysheva, «Egemen Qazaqstan».
Astanadaǵy Jastar teatrynda rejısser N.Jaqypbaıdyń «Tilep Saryqyz» atty tragedııalyq qoıylymy sahnalandy. Onda qazaq halqynyń basynan keshken tarıhy, jaýgershilik zaman, qos ǵashyqtyń qosyla almaı ketken baıansyz, kelte mahabbaty sýretteledi.