Álem aıyptaǵan terrorlyq akt

Tártip saqshylarynyń málimetinshe, jarylysty jan­keshti er adam jasaǵan. Jaryl­ǵysh zatty iske qosqan ol ózi de oqıǵa ornynda kóz jum­ǵan. Oqıǵany terrorlyq áre­ket dep baǵalaǵan tártip saq­shy­lary qazir terrorshynyń basqa da sybaılastarynyń bar-joǵyn tekserip jatyr.

Taǵylyq qanquıly áreket saldarynan, sońǵy derekter boıynsha, 22 adam qaza tapsa, 59 adam jaralanǵan. Oqıǵa ornyna jedel járdem qyzmetiniń 60 kóligi men 400 tártip saqshysy jumyldyrylyp, qaladaǵy 8 aýrýhana jaralanǵandarǵa em-dom jasap jatyr. Po­lı­sııa qyzmetkerleriniń málim­deýinshe, bul taǵylyq áreket 2005 jyly Londonda 50 adam­nyń ómirin qıǵan lańkestik oqıǵadan keıingi Brıtanııa tarıhyndaǵy eń aýyry bolyp otyr.

Ulybrıtanııa premer- mınıstri Tereza Meı 8 maý­- symǵa josparlanǵan eldegi parlamenttik saılaý naýqanyn toq­tatyp, lańkestikti uıym­das­tyrǵandardyń kim ekenin anyqtaý maqsatynda úkimettiń tótenshe otyrysyn ótki­zetinin málimdedi. «Qaza tap­­qan­dardyń otbasy men jaqyn­daryna kóńil aıtamyz. Oqı­ǵanyń mán-jaıyn anyqtaý úshin jumys isteımiz», – dedi úkimet basshysy.

Málimetterge qaraǵanda, Arıana Grandeniń konsertinde Qazaqstan azamattary da bolǵan. Elimizdiń Syrt­qy ister mınıstrligi konsertke qazaqstandyq alty stýdenttiń barǵanyn aıtty.

Degenmen, jarylystan zardap shekkender arasynda qazaq­standyqtar joq. «Bizdiń dıplomattarymyz solardyń ekeýimen baılanys jasap, aman-saý ekendigine kóz jetkizdi. Olarǵa eshqandaı me­dı­sı­nalyq kómek qajet emes jáne dostarymen birge turatyn jer­lerine aman-esen jetken», deıdi Qazaqstan Respýblıkasy Syrt­qy ister mınıstrligi baspasóz qyz­metiniń basshysy Ánýar Jaınaqov.

«Londondaǵy Qazaqstan el­shi­ligi jergilikti quqyq qorǵaý or­­gandarymen tyǵyz baılanys­ta. Qazaqstan azamattaryna saq bolý jóninde eskertýler tara­tylǵan. Elshiliktiń konsýldyq bóli­miniń jedel jelisi iske qosýly: +44(0)7447470570 (Whats­App).  Manchesterdegi jaqyn­dary­ńyz, týystaryńyz nemese dos­taryńyzben baılanysyp, olar­dyń aman-esen ekendigine kóz jet­kizýlerińizdi suraımyz», dep jazdy Syrtqy ister mınıstrligi bas­pasóz qyzmetiniń basshysy.

Qaıǵyly oqıǵaǵa oraı basqa da elder basshylarynyń qatarynda Qa­zaq­stan Respýblıkasynyń Prezıdenti Nursultan Nazarbaev ta kóńil aıtyp, jedelhat joldady. AQSh prezıdenti Donald Tramp terror­lyq áreketti qatań aıyptaı otyryp, mundaı adamdardyń paıda bolýyna áser etetin ıdeologııany túbirimen qurtý kerektigin aıtty. Al Fransııa prezıdenti Emmanýel Makron Ulybrıtanııa premer-mınıstri Tereza Meıge kóńil aıtsa, premer-mınıstr Edýard Fılıp Fransııa turǵyndaryn abaı bolýǵa shaqyrdy. Qytaı Halyq Respýblıkasynyń tóraǵasy Sı Szınpın Ulybrıtanııa hanshaıymy II Elızavetaǵa kóńil aıtyp, qıyn kezderde Qytaı men Ulybrıtanııanyń bir-birine qoldaý kórsetetinin jetkizdi.

Terrorlyq áreketti «Is­lam mem­leketi» delinetin (Qazaq­stan­da tyıym salynǵan) terror­lyq uıym óz moınyna aldy. Buqa­ra­­lyq aqparat quraldarynyń máli­me­tinshe, oqıǵadan birneshe saǵat keıin atalǵan qanquıly uıym lań­kes­teri Manchesterdegi jarylysqa uq­sas vıdeony ınternette taratqan.  

Baýyrjan MUQANOV, «Egemen Qazaqstan»