Ǵalym ustazǵa qurmet

Basqosýdy ashqan fakýltet dekany, fılologııa ǵylymdarynyń kandıdaty, professor Qaırat Saq mereıgerdiń ǵalym, ustaz retindegi qyzmetine qys­qasha sholý jasap ótti. «Aıtmuhamet Oraz­baıuly – Astana qalasynda jýrnalıstıka mektebiniń qalyptasyp, damýyna aıryqsha úles qosqan sanaýly sańlaqtarymyzdyń biri. Bedeldi bilim ordasy Eýrazııa ulttyq ýnıversıtetinde «Jýrnalıstıka» kafedrasynyń órken jaıyp, qanat qaǵýyna eren eńbek sińirgen marqasqa. Reseıdi aıtpaǵanda, Amerıka qurlyǵyna bir emes, birneshe ret baryp, alpaýyt eldiń jýrnalıstıkasyn zerttep qana qoımaı, óz bilgenin shákirtter qulaǵyna quıyp, básekege qabiletti maman daıyndaýǵa erekshe umtylys tanytyp keledi. Thomson Reuters tizimine engen ǵylymı áleýeti joǵary jýrnalda maqala jarııalap, monografııasyn aǵylshyn tilinde Amerıkada basyp shy­ǵarǵan fakýltetimizdiń mańdaıaldy ǵalymy», dedi.

Ýnıversıtet rektory Erlan Sady­qovtyń quttyqtaý hatyn oqý ornynyń prorektory belgili ǵalym, professor Dıhan Qamzabekuly oqydy. So­nymen qatar, ýnıversıtettiń ǵylymı keńesiniń sheshimimen A.Esdáýletovke oqý ornynyń eń joǵarǵy marapaty – Kúltegin medaliniń berilgendigin aıtyp, osy marapatty keýdesine qadady.

Munan keıin mereıger týraly tú­sirilgen shaǵyn derekti fılm kórsetildi.

Sóz kezegin aldymen alǵan Parla­ment Májilisiniń depýtaty, qazaq kó­sem­sózinde sony soqpaq salǵan elimiz­ge tanymal jýrnalıst, pýblısıst, ǵa­lym Saýytbek Abdrahmanov A.Es­dáýletovtiń jýrnalıs­tıka salasyndaǵy oqytýshylyq, ustaz­dyq qyzmetine toqtala kele, onyń qoǵam­dyq ortada qa­lyptasqan tulǵasy týraly óz oılaryn órbitti. «Qazaqqa Esdáý­le­tov degen famı­lııany alǵash ta­nyt­qan Aıtmuhamettiń aǵasy Ulyqbek Esdáý­letov ekeni bel­gili. Alaıda Aıtmu­hamet Ulyqbektiń kóleńkesinde qalmaı, ózin jańa qyrdan tanyta bildi. Onyń uzaq jylǵy ǵylymı jáne ustazdyq qyzmeti men osy salada jetken jetistikteri sonyń dáleli», dedi.

Qazaq jýrnalısteriniń birneshe býynyn tárbıelegen belgili ǵalym Namazaly Omashev, esimi elimizge keńinen tanymal ǵalym, alashtanýshy Tursyn Jurtbaı, belgili saıasattanýshy ǵalym, professor Náýbat Qalıev, tarıhshy ǵalym, professor Qyryqbaı Allabergen, fakýltettiń Teleradıo jáne qoǵammen baılanys kafedrasynyń meńgerýshisi, telejýrnalıster ustazy Aıazbı Beısenqulov, fılologııa fakýltetiniń professory, fı­lologııa ǵylymdarynyń doktory Rahymjan Turysbek, jazýshy Tur­lybek Mámeseıit jáne basqalar sóz alyp, A.Esdáýletovtiń ǵylymı shy­ǵarma­shylyq, ustazdyq qyzmetine, adamger­shilik, azamattyq beınesine san qyrynan toqtalyp ótti.

Almatydaǵy ál-Farabı atyndaǵy Qazaq memlekettik ýnıversıtetin bitir­gennen keıin birqatar jyldar jýrnalıst retinde jemisti qyzmet at­qar­ǵan Aıtmuhamet Esdáýletovtiń ózi­niń alǵashqy ustazdyq qyzmetin atal­ǵan ýnıversıtettiń qabyrǵasynda bastaǵandyǵy belgili. Osy ýnıversıtetke sińirgen eńbegin ondaǵy áriptesteri de umytpaǵan eken, myna jaqtaǵy jıynǵa arnaıy ókilderin jiberipti. Osy boıynsha sóz alǵan QazMÝ-diń Jýrnalıstıka fakýltetiniń kafedra meńgerýshisi Jetpisbaı Bekbolatuly osy oqý ornynyń ǵylymı keńesiniń sheshimimen berilgen joǵarǵy marapaty – ál-Farabı medalin A.Esdáýletovtiń tósine qadady.

Mereıgerdi E.A.Bóketov atyn­da­ǵy Qaraǵandy memlekettik ýnıver­sıte­tindegi ustazdar qaýymy atynan osyndaǵy jýrnalıstıka kafe­dra­synyń professory Vera Ábisheva qut­tyqtady.

Quttyqtaý saltanaty barysynda EUÝ Jýrnalıstıka jáne saıasattaný fa­kýlteti Baspasóz jáne baspa isi ka­fe­drasynyń kúshimen daıyndalǵan «Jýrnalıst. Redaktor. Baspager» atty jańa basylymnyń tusaýy kesildi. Bul ba­sylymnyń jeke bir taraýy A.Esdáý­letov­tiń ǵylymı-ustazdyq qyzme­tine arnalǵan.

Suńǵat ÁLIPBAI, «Egemen Qazaqstan»