Májilis terrorızm úshin azamattyqtan aıyrýdy maquldady

Otyrysta «Qazaqstan Respýblıkasynyń keıbir zańnamalyq aktilerine olardy Qazaqstan Respýblıkasy Konstıtýsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» QR zańynyń jobasy jóninde Ádilet mınıstri Marat Beketaev baıandama jasady. Onyń aıtýynsha, usynylyp otyrǵan zań jobasynyń maqsaty zańnamalyq aktilerdi Konstıtýsııaǵa engizilgen túzetýlerge sáıkes keltirý. Joba Prezıdenttiń Jarlyǵyn iske asyrý maqsatynda ázirlendi. Konstıtýsııaǵa sáıkes keltirý úshin 7 kodeks pen 46 zańǵa ózgerister engizý qajet.  «Qylmystyq kodekstiń 21 babyna azamattyqtan aıyrý túrindegi qosymsha qylmystyq jaza engizý kózdeledi. Osylaısha, Qylmystyq kodekstiń 10 babynda kózdelgen 14 asa aýyr terrorıstik qylmystar quramy boıynsha qosymsha jaza retinde azamattyqtan aıyrý usynylyp otyr. Mysaly, terrorızm aktisi úshin, terrorıstik top qurý, oǵan basshylyq etý jáne onyń áreketine qatysqany úshin jáne taǵy basqalary», – dedi mınıstr.  M.Beketaev «Ulttyq qaýipsizdik týraly» Zańǵa sáıkes negizgi ulttyq múddelerge konstıtýsııalyq qurylystyń tutastyǵy jatatyndyǵyn atap ótti. Bul uǵymǵa eldiń táýelsizdigi, birtutastyǵy jáne prezıdenttik basqarý nysany kiredi.  «Qazaqstan Respýblıkasynyń negizgi ulttyq jáne ómirlik mańyzy bar múddelerine aýyr zııan tıgizetin qylmystarǵa 11 bapta kózdelgen 16 túrli qylmys quramdary kirdi. Mysaly, genosıd, separatıstik áreket, ekstremıstik top qurý, oǵan basshylyq etý nemese onyń áreketine qatysý jáne taǵy basqalary. Bul jazany sot erekshe jaǵdaılarda jasalǵan is-áreketterdiń jáne ákep soqqan zardaptyń aýyrlyǵyn, istiń naqty mán-jaıyn negizge ala otyryp taǵaıyndaıdy. Azamattyqtan aıyrý sottyń zańdy kúshine engen aıyptaý úkimi negizinde ýákiletti organda tirkeýge jatady», – dedi ol.