Qazaqstannyń Ádilet mınıstri Marat Beketaev arnaıy jumys tobynyń qaıta bólinetin ókilettikterdi belgilegenin aıtty. Ol Prezıdenttiń ekonomıkalyq-áleýmettik salany retteýge qatysty ókilettikteri bolmaq. Mınıstr Prezıdent ókilettikteriniń úsh baǵyt boıynsha qaıta bólinetinin aıtty.
Birinshi baǵytqa sáıkes, memleket basshysynyń ekonomıkalyq prosesterdi retteýge qatysty mynadaı ókilettikteri Úkimetke beriletin bolady:
· ekonomıkanyń ındýstrıaldyq-ınnovasııalyq damýdy qoldaý salasyndaǵy basym sektorlaryn aıqyndaý;
· arnaıy ekonomıkalyq aımaqtar qurý;
· Ulttyq bank pen tıisti ókiletti organdardyń birlesip jasaǵan usynysy negizinde arnaıy valıýtalyq rejim engizý;
· memleket-jeke áriptestik maqsattary úshin berýge bolmaıtyn nysandar tizimin aıqyndaý.
«Zań jobasyna sáıkes, teńizde, ishki sý qoımalarynda, tótenshe ekologııalyq ahýal aımaqtarynda, aıryqsha qorǵalǵan tabıǵı terrıtorııalarda munaı operasııalaryn júrgizý múmkindikteri týraly sheshimdi budan bylaı Úkimet ózi qabyldaıtyn bolady» dedi Marat Beketaev.
Mynandaı ókilettikterdi Úkimet Prezıdent jáne Prezıdent ákimshiligimen birlese otyryp oryndaıdy:
· memlekettik josparlaý júıesin aıqyndaý;
· Jeke kásipkerlik sýbektilerin tekserýdi belgili bir ýaqytqa toqtatý týraly sheshim qabyldaý;
· memlekettik organ týraly tıptik erejeni bekitý;
· memleket menshigindegi jáne kvazımemlekettik sektor menshigindegi ıelikten shyǵarýǵa bolmaıtyn sýbektiler tizimin bekitý.
Ekinshi baǵyt boıynsha, Prezıdenttiń áleýmettik mańyzǵa ıe ókilettikterin berý qarastyrylǵan. «Mysaly, «Qazaqstan Respýblıkasynyń merekeler týraly» zańynda merekelik datalar tizimin bekitýdi Úkimetke berý usynyldy. Sonymen qatar bonýstar tóleý, materıaldyq járdem jasaý, memlekettik qyzmetkerlerge ústeme aqy tóleý tártibin aıqyndaýdy Úkimet Prezıdent ákimshiligimen kelisim boıynsha oryndaıdy» dedi mınıstr.
Úshinshi baǵyt boıynsha, Prezıdenttiń keıbir uıymdastyrý ókilettikterin berý usynylǵan. Oǵan sáıkes Úkimetke oblystar men respýblıkalyq mańyzǵa ıe qalalardyń shekarasyn belgileý, aıryqsha strategııalyq mańyzǵa ıe sý sharýashylyǵy qurylystarynyń tizimin bekitý sııaqty ókilettikter berilýi múmkin.
Erjan Ábdiraman, "Egemen Qazaqstan"