Japonııanyń jańa premer-mınıstri eldiń qarjy mınıstri Iosohıko Noda bolady. Keshe ol Japonııanyń bıleýshi Demokratııalyq partııasynyń jańa tóraǵasy bolyp saılandy. Daýys berýdiń ekinshi kezeńinde I.Noda parlament músheleriniń 215 daýysyna ıe boldy.
Al I.Nodanyń negizgi qarsylasy, Japonııanyń óndiris isteri jónindegi mınıstri Banrı Kaıedýdi bıleýshi partııanyń parlamenttegi 107 depýtaty qoldady. Bul úderis eldiń premer-mınıstri bolǵan Naoto Kan 26 tamyzda otstavkaǵa ketkennen keıin júzege asyryldy. Al Iosohıko Noda úkimet basshysy laýazymyna búgin bekitilýi tıis. Jalpy, ol Japonııanyń sońǵy bes jyldaǵy altynshy úkimet basshysy bolmaq.
KELISSО́Z TÝRALY USYNYSYN QABYLDAMADY
Lıvııadaǵy kóterilisshiler Mýammar Kaddafıdiń bılikti ótkizýge baılanysty kelissóz júrgizý usynysynan bas tartqan. M.Kaddafıdiń dál qazir qaı jerde jasyrynyp júrgeni de belgisiz. Izdestirý operasııalary ázirge esh nátıje bermeı otyr.
Osy aralyqta Lıvııa kóterilisshileri áskerı komandovanıesiniń ókili Ahmed Banı sońǵy kúnderi Lıvııa túrmelerinen 10 myńnan astam adam bosatylǵanyn habarlady. Onyń aıtýynsha, burynǵy bılik tutqyndaǵan 50 myńdaı adam is júzinde iz-túzsiz joǵalyp ketken. Kóterilisshilerdiń pikirlerinshe, olardyń kópshiligi búginde tiri bolmaýlary da múmkin. Tutastaı alǵanda, Lıvııadaǵy soǵys aıaqtalǵan joq.
ELDIŃ SOLTÚSTIK-BATYSYNA REID JÚRGIZDI
Sırııa prezıdenti Bashar Asadqa senimdi jasaq burnaǵy kúni eldiń soltústik-batysyndaǵy Idlıb provınsııasynda qarýly reıd júrgizdi. Áskerıler men qaýipsizdik qyzmeti is-áreketiniń saldarynan kem degende eki adam qaza taýyp, toǵyzy jaraqattanǵan.
Quqyq qorǵaýshylardyń sózderine qaraǵanda, Idlıb qalasynda jergilikti turǵyndarǵa 10 tankiden jáne avtomatty qarýlardan oq jaýdyrylǵan. Qaza tapqandar men zardap shekkenderdiń sany ósýi múmkin delinip otyr. Keshe Damaskige Reseı syrtqy ister mınıstriniń orynbasary ushyp keldi. Sapar maqsaty týraly naqty málimet joq.
ZAŃDYLYǴYN MOIYNDAÝDAN BAS TARTTY
26 tamyzda Abhazııada prezıdenttik saılaý ótip, onda Aleksandr Ankvab 54,9 paıyz daýyspen jeńiske jetti dep jarııalanǵan edi. Reseı 2008 jyldyń tamyzyndaǵy Grýzııamen qarýly qaqtyǵys nátıjesinde jarııalanǵan Abhazııanyń jáne Ońtústik Osetııanyń táýelsizdigin tanyǵan bolatyn.
Eýropalyq Odaqtyń syrtqy saıasat jáne qaýipsizdik jónindegi Joǵarǵy komıssary Ketrın Eshton men NATO-nyń bas hatshysy Anders Fog Rasmýssen Abhazııadaǵy prezıdenttik saılaýdyń zańdylyǵy moıyndalmaıtyndyǵyn málimdedi. Olardyń pikirlerinshe, atalǵan uıymdar halyqaralyq quqyq normalary talap etetinindeı, Grýzııanyń aýmaqtyq tutastyǵyn qoldaıdy.
PREZIDENTTIKTEN JOLY BOLMAǴAN AQTALDY
Qyrǵyzstanda bıznesmen, prezıdenttikten burynǵy úmitker Ýrmat Baryktabasov túrmeden bosatyldy. Ol óziniń jaqtastarymen 2010 jyly Bishkekke qarý jetkizbek bolǵany úshin 4 jylǵa sottalǵan edi. Endi ol saıasatpen múldem aınalyspaıtynyn málimdep otyr.
Ýrmat Baryktabasov buryndary Qyrǵyzstanǵa janar-jaǵar maı jetkizýmen aınalysqan. Jergilikti buqaralyq aqparat quraldarynyń derekterinshe, 1991 jyldyń ózinde-aq ol dollarly mıllıoner bolǵan eken. 2005 jylǵy «qyzǵaldaq tóńkerisi» aldynda oppozısııalyq partııa quryp, prezıdenttikke túspek nıet tanytqan. Ý.Baryktabasovtyń advokaty endi ony tolyq aqtaýǵa kúsh salmaq.
3,7 MYŃ TUTQYNǴA KEShIRIM JASALDY
Túrkimenstan prezıdenti Gýrbangýly Berdymuhamedov «Qadir túnine» oraı birqatar sottalǵandarǵa keshirim jasaý týraly jarlyq shyǵardy. Respýblıkada «Qadir túniniń» qurmetine mundaı aqtaý sharalary jyl saıyn júzege asyrylady.
Buǵan eldiń burynǵy prezıdenti Saparmurat Nııazov dańǵyl jol salyp ketken bolatyn. Bul joly qamaý oryndarynan shamamen 3,7 myń adam bosatyldy. О́tken jyly atalǵan shara aıasynda aqtalǵandar sany shamamen 4 myń adamdy quraǵan edi. Prezıdent jergilikti bılik organdaryna burynǵy sottalǵandardy jumysqa ornalastyrý jaǵynan kómektesýdi tapsyrdy.
QYSQA QAIYRYP AITQANDA:
Iraktyń astanasy Baǵdad qalasyndaǵy súnnıtterdiń Ýmm ál-Kýra meshitinde jarylys jasaldy. Lańkestik saldarynan 28 adam opat bolsa, 37-si jaralanǵan. Bombany jankeshti iske qosqan.
О́zbekstanda 1 qyrkúıekte atap ótiletin táýelsizdik kúni merekesine oraı barlyq ańshylardan qarýlary ýaqytsha tartyp alyndy. Bul shara qaýipsizdik maqsatynda jasalyp otyrsa kerek. Elde ańshylyq maýsymy 15 tamyzda ashylǵan bolatyn.
AQSh-ta «Iren» daýylynan qaza tapqandar sany 14 adamǵa jetti. Eldiń Atlant muhıty jaǵalaýlaryndaǵy 9 shtatynda tótenshe jaǵdaı jarııalanyp, barlyq áýejaılar men teńiz porttary jabyldy. 1,5 mln.-ǵa jýyq adam qaýipsiz jerlerge kóshirildi. Keshe «Iren» álsiregendeı qalyp tanytty.
26 tamyzda Aljırdiń Shershel qalasynda lańkestik jasalyp, jarylys saldarynan 18 adam kóz jumǵan edi. Lańkestikke jaýapkershilikti keshe «Ál-Kaıdanyń» Soltústik Afrıkadaǵy bólimshesi moınyna aldy.
Reseıdiń Tver oblystyq sotynda «Nevskıı ekspress» poıyzy jarylýyna qatysty aldyn ala tyńdaý bastaldy. Is jabyq rejimde qaralýda. Lańkestikke baılanysty Ingýshetııanyń on týmasy aıyptalyp otyr. 2009 jyldyń 27 qarashasynda bolǵan lańkestik saldarynan 27 adam ólip, 130-y jaralanǵan bolatyn.
Internet materıaldary negizinde ázirlendi.