Búgin, dúısenbi kúni Beeline Qazaqstan «Áleýmettik plıýs» tarıftik josparynyń ashylǵany týraly habarlady. Bul ónim densaýlyǵyna baılanysty múmkindigi shekteýli qazaqstandyqtar úshin arnaıy jasaldy.
Máselen, Dúnıejúzilik densaýlyq saqtaý uıymynyń málimeti boıynsha, múmkindigi shekteýli adamdardyń jalpy sany 1 mıllardtan asady. Olardyń 80 paıyzy damýshy elderde turady. Bizdiń elimizde 600 myńnan astam múgedek jandar bar. Mundaı jaǵdaıda múmkindigi shekteýli jandar tıisti tehnologııaǵa qol jetkizse, qoǵam ómirine tolyq aralasyp, ekonomıkaǵa aıtarlyqtaı úles qosa alady.
Sonymen «Áleýmettik plıýs» tarıftik josparynyń sharttary boıynsha, 990 teńge abonenttik tólemge klıent jeli ishinde sheksiz sóılesip, Beeline nómirlerine 200 SMS joldaı alady jáne basqa operatorlarǵa qońyraý soǵýǵa arnalǵan 60 mınýt pen 7Gb mobıldi ınternet alady. Tólem belgili bir kúnde emes, 30 kúnde bir ret ustalady. Eger qoldanýshy qandaı da bir sebeppen abonenttik tólemdi ýaqytynda tóleı almasa, qońyraýlar men SMS-tiń quny 7 teńgeni quraıdy.
«Zamanaýı tehnologııalar múmkindigi shekteýli jandarǵa buryn-sońdy bolmaǵan jaǵdaı týǵyzyp otyr. Bul jerdegi sheshýshi másele – ınternettiń qol jetimdiligi. Endi áleýmetpen keńinen aralasyp, jeke tulǵa retinde damýǵa kómektesetin arnaıy mobıldi qosymshany qoldaný múmkindigi paıda boldy. Taǵy bir mańyzdy másele múmkindigi shekteýli adamdardyń kópshiliginiń tabysy óte tómen. Sol sebepti biz, múmkindigi shekteýli jandardyń tolyqqandy ómir súrýine tarıf sheńberinde jaǵdaı jasaı otyryp, tómen baǵaǵa mobıldi ınternettiń úlken kólemin usynamyz», – deıdi Beeline Qazaqstannyń bas atqarýshy dırektory Oleksandr Komarov.
«Áleýmettik plıýs» arnaıy tarıftik josparyn qosý úshin Beeline Qazaqstannyń Satý jáne qyzmet kórsetý keńselerine baryp, jeke kýálik pen múgedektigin rastaıtyn kýálikti kórsetý kerek jáne ótinish jazý qajet. Joǵaryda aıtylǵandaı, tarıfke múmkindigi shekteýli barlyq qazaqstandyq qatysa alady.
Aınash ESALI, «Egemen Qazaqstan».
ALMATY