Birlik Týy – bizdiń Tý (Elbasymen syrlasý)

Elbasymyzdyń kúni-túni tynbaı, Máńgilik Elimiz úshin jasaǵan uly isterinen habardar bolǵan saıyn, mektebimniń, bıylǵy túlekterdiń, dostarymnyń atynan alǵysymdy qalaı jetkize alamyn degen oıǵa batamyn. Arman qanatyn baılap alyp, keıde Elbasymyzben kezdesip, dıdarlasqym keledi... Jarqyn ómir... Baqytty bala­lyq sátter... Asa mártebeli Elbasy! Sizdi teledıdardan kórip otyryp, keıde tań qalamyn. «Bizdiń Prezıdentimiz óte kóp jumys atqarady, alaıda barlyǵyna qalaı úlgeredi eken?», – dep óz-ózime suraq qoıamyn. Sondaǵy túsin­genim, Sizdiń boıyńyzda úlken qasıet bar eken. Ol qasıet ardaqty anańyzdyń aq sútimen daryǵan dep oılaımyn. Nursultan ata, Siz búgin búkil álemge tanylǵan tulǵasyz. Elimiz­diń kóshin bastap júrgen Kóshbasshysyz. Elimizdiń baǵyna týǵan kemeńger, danasyz. Solaı bola tursa da, Siz júregi darhan, kóńili baladaı, aýyldy ańsaıtyn qazaqtyń qara domalaq balasysyz. Ony myna jazbańyzdan ańǵardym. Oqyp otyryp, erekshe tolǵandym... «...Bala kezimizde mektepke bara jatqanda, keń kósheniń boıynda keńesip, ótken-ketkenniń sálemin sátimen alyp, batasyn berip, baqy­tyńdy ústep otyratyn qarııalardy kóp kóre­tinbiz. Olardyń aldyn kesip ótpeı, toqtap, nazaryn aýdaryp, aýzymyzdy toltyryp «Assalaýmaǵaleıkúm» dep amandasyp, sonan soń kópten kútken kerek isti tyndyrǵandaı bolyp, shattana júgirip bara jatatynbyz...». Qandaı ádemi kórinis!.. Meniń kóz aldymnan baqytty balalyqtyń altyn besiginde terbelgen, arqasyna kitap toly ájesi kestelep tigip bergen dorbasyn asynǵan, syrma shalbar kıgen, onyń qaltasyndaǵy asyq-saqalarmen maqtanyp, qarııalaryn qazynaǵa balap bara jatqan bir top oqýshy-balalar eles berdi... Nursultan ata, senesiz be, sol shattanǵan balalar ishinen men Sizdi birden tanyp qoıdym. Shyn aıtamyn. Sizdi «Meniń balalyq shaǵymnyń aspanynan» kórdim ǵoı... Men de búgin kúndegideı mektepke bara jatyrmyn. Aınalamnyń bári ásem. Ádemi ǵımarattar kóz tartady. Nursultan ata, Siz týǵan ólke – Jetisý jeri kúnnen-kúnge qul­pyryp barady... Nursultan ata, balalyq shaq­tyń aspany degen ǵajap eken! Balalyq shaqtyń joldary, Siz aıtqandaı, úlken-úlken baqyt joldaryna bastaıdy... Bireýdi izdeısiń, bireýdi joǵaltasyń, eń bas­tysy, baqytty shaqtyń tátti elesi sanadan óshpese kerek... Taǵy da bylaı dep jazypsyz, Nursultan ata: «...Qazir de, jolym túskende, sol baıaǵy balań súrleýmen taǵy da júrip ótkendi unatamyn. Sol kezde ár úıdiń aldynda otyrǵan aq saqaldy abyz qarııany, aq jaýlyqty áz analardy taǵy da kórem be dep eleńdeımin... Solarmen birge ketken qımas shaq – balalyq baldáýrendi búgingi ulandardyń boıynan kóremin be dep, kóshede júgirip bara jatqan búldirshinderdiń sońynan uzaq qarap qalatynym bar...». Árıne, kóre alasyz, Nursultan ata! Ol – biz ǵoı! Qımas shaq – balalyq baldáýrenińiz bizdiń boıymyzda saqtalǵanyna esh kúmánińiz bolmasynshy... Ár úıdiń aldynda otyrǵan aq saqal­dy abyz qarııa men aq jaýlyqty áz ana­lardy da kóre alasyz... Olardyń qatarynda meniń súıikti atam men ájem de bar... Tek, Sizden bir ótinerim – Je­tisýǵa jıi kelip turyńyzshy... Sizdi Táýelsizdiktiń tal besi­gin­de terbelgen ul-qyzdaryńyz, Siz­diń baqytty balalyq shaǵyńyz kútedi... Biz qazir eseıdik. Az ýaqyttan soń altyn uıa – mektebimizben qoshtasamyz. Bizdiń uranymyz, Siz ózińiz aıtqan­daı: «Eldiń kúshi – birlikte». Bul sózińizde úlken mán, maǵyna bar. Rasynda da, barlyǵymyzdyń basty ustanymymyz Birlik bolýy kerek. Biz – jas urpaq birlikti tý etip ustasaq, úlken jetistikterge jetemiz. Eldiń tiregi de, bolashaǵy da – bizdermiz. Nursultan ata, Sizdiń jıyrma bes jyl ishinde Táýelsiz Qazaq­stanǵa qosqan úlesińiz de, sińirgen eńbegińiz de sansyz. Qazaq eline bergen sertteı sózińiz ben serpindi isińiz ári qaraı jalǵasa beretini sózsiz! Jámıla BAHTIIаRQYZY, Taldyqorǵan qalasyndaǵy №9 orta mekteptiń 11 «Á» synyp oqýshysy Almaty oblysy